آزاتی

محمد حسین عنقا

( اومان – اگست 1955)

چہ ھر راھے کہ آزاتی ءِ ازم کئیت انت زیبائیں

ھمائی گام گام ءَ چمّ ءِ نوراں چیر گیجائیں

ھمائی لوپ لوپ ءَ شادے ُپلّیں تگردے گیج

او سجدگ ھر پڑاءَ شوقءِ پیشانی یے پرمائیں

درا دیمائی بشکند ءِ پری ءَ لئیب دارا

او نازینک ءِ سروز ءِ تار تار ءَ نرم وجّائیں

پہ وش اتکائی دیم ھونی پکن درسیں پدی رنجاں

چہ دیمائی رہءِ دنزاں گوں مھرءِ عطر شودائیں

ھمے سرمالیں قربانیءِ ھر ھر چیدگ ءِ چَکّا

کتابی ئیں وفایانی چراگان ءَ بلگائیں

گلامی ءِ درہ ویلانی قصّھان ءَ بلّ

بزیرائیں کتاب ءَ جند ءِ بخت ءِ او بلکائیں

ماں ھرھوڈے دورہءِ بیت مارے بے کشگ نئیل ئے

ماں ھر بندے بدیں شوانے پکش سسّیءَ بچّائیں

ماں ھر داماں کہ ظلمءِ کلّرے گندئے بروسّینی

مان ھر کوہ ءَ کہ آپے بیت انصاف ءِ بکشّائیں

درہ ملکءَ چہ ترسءِ گندہ وھمیں جاتواں گلّین

درہ قوم ءَ شرابے جوانیں سیالی ءِ پتنگائیں