بلوچی مۓ وتی شھديں زبان انت

اسماعيل اميری

ماتی زبانء جھانی روچ

راجانی پجار و دود و ربیدگ ءِ مستریں عنصر زبان زانگ بیت انت ۔ یک راجےءِ زبانءِ ڈالچار کنگ و یا چہ آییءِ دیمرویءَ دیمگیری کنگ ، پہ آییءِ بیگواھیا چن و لانچ کنگا برابرانت۔زبانءِ مرگ گوں آ راجء میراثانی بزاں موسیقی و لبزانکء میزریں کشارءِآدرہ بیگ و آسرا دود و ربیدگءِ بیگواھی انت۔ راجےءِ کہ زبان و دود و ربیدگ ولگوج کنگ بیت انت بزاں آ راجءِ گڑا وجود و ھستی ھم ڈڈتریں و حاکمیں راجءِ دود و ربیدگءِ اوساہءَ ایر روت و گار بیت۔

مروچیگیں دنیاءَ گوں علم و تکنولوژیءِ دیمرویءَ یک نیمگے پہ مۓ وڑیں نزوریں راجاں ،راہ و در ودی کتگ انت تا کہ پہ وتی دود و ربیدگ و زبانءِ زندگ دارگ و دیمرویءَ شرتر و گیشتر کار کت بکنیں بلے آ دگہ نیمگا گوں بالادستیں راجءِ ظالمیں حکومت و پالیسیانی سببءَ ، دری دود و ربیدگ و زبانانی ھار و ھیروپ مۓ ھزارانی سالءِ راجی میراثاں روپان و ایربران انت۔

ھمے گؤستگیں دو سۓ سدیاں زبانانی بیگواھیءِ رواج سکّ تیز بیتگ؛زبانانی پٹ و پول کنوک گش انت کہ ھر ماھے دو زبان گار و بیگواہ بیت انت ۔

پہ جھانءِ زبانانی چشیں تیز رواجیں بیگواھیءِ دیمگیریءَ یونایٹڈ نیشن و یونسکوءَ لھتے گامگیج زرتگ و فروریءِ بیست و یکمی روچ ماتی زبانءِ جھانی روچ منّ اتگ و جار جتگ ۔

ماتی زبانءِ جھانی روچ چہ بنگلادیشءِ نیمگا ماں 1999ءِ سالءَ پیشنھاد و یونسکوءَ پیش کنگ بیت۔

بنگلادیشءِ ملک و راجءَ درآمدیں زوراکانی ظلم و زورانسری دیستگ و تجربہ کتگ اتنت ۔ بنگلادیشءِ ورنایاں کہ پہ وتی راجی زبانءِ پھریزگءَ وتی ھون ریتک انت و ماتی زبانءِ کشار آپ دات۔وتی آجویی اش گپت و ماتی زبانءِ جھانی روچ ھم چہ آھانی کوشش و ھمکاریءَ منّگ بیت۔

بیا کہ ما و شما ھم پہ وتی زبانءِ پھریزگءَ وتی کچّ ءَ کوشش و عملی گامگیج بزیریں۔ رندیگیں اپسوز و دستانی مشگ بے سیت انت۔چیا کہ ظالم و زوراکیں واکداراں دیرانت کہ پہ مۓ بیگواھیءَ شؤر کتگ و لانک بستگ۔

من کوشش کنان وتی ماتی شھدیں زبانءَ ھر ھپتگ چیزکے نبشتہ بکناں۔پہ اے امیتءَ کہ سکینے پہ راجدوستان ببیت و کچّل و ماجینّ پہ راج دشمناں و ھمے پیما بلکیں کسانکیں خدمتے پہ بلوچی ء۔

بلوچی سبز بات