دشمنی گوں ناکو سامءَ یا دوستی گوں ازلی دشمنءَ

1979ءِ سالءَ ، شاھانی شاہ محمد رضاشاہ پھلوی آریامھر (وتگڑیں آریایی نژاد پرستیءِ ھرچ لقبے کہ تا آ وھدی ھست ات ، ایرانءِ نسل پرستیں دانشوراں ، محمد رضا و آییءِ خاندانءِ نامانی لِٹکءَ گرنچ داتگ اتنت) ءِ کلولوءِ کلات چپیگ بیت ۔ بندیگجاھانی لوھیں دروازگ پچ کنگ بیت انت ، سیاسی بندیگانی پادانی شنگر سندگ بیت انت ۔ سیاسی چست و ایر بنگیج ، گلّ و ھوربنداں پدا ساھے پرّ کت و تاکبند و نبشتانک ھر نیمگا تالان ۔

دیر نہ گوست کہ نوکیں سیاہ پاگیں واکداراں ، محمد رضاءِ "شاھنشاہ آریامھر"ء لقبءِ بدلءَ وتی حکومتی سیستمءِ دُمبءَ "ولایت فقیہ" و "روح اللہ "ءِ لقب لچینت انت و وتا را اسلامی نامے پر بست – نوں کجام مسلمان ات کہ اسلام ءِ مخالفتءَ کت بکنت ؛ گڑا بزاں ماتءَ نیاورتگ ۔ گوں اے درستیں وتگڑیں لقباں ، سامراج دشمنیءِ پاگ ھم سرءَ بست ۔ نوکیں سیاہ دل و سیاھپاگیں واکداراں ، لقبانی گرھتاچیءِ پڑ ءَ چہ پیسریگیں رژیمءَ باج برت ۔

اسلامی جمھوریءِ گناھکاریں چمّاں "خداءِ روح" (نعوذ بااللہ) "خمینی"ءِ عکس ماہءِ تھا دیست و پاکیں پیغمبر ءِ جھگیر جوڑ کنگ بیت ۔ آییءِ و آییءِ رژیمءِ خلاف بیگ کفر و اسلام دشمنی قرار دیگ بیت ۔ اے پیما ایرانءِ اسلامی جمھوریءِ راج دشمنیں رژیمءِ پادگ مھر کنگ بیت انت ۔ سیاسی جھد کارانی گر و بند و بندیگجاھانی آباد کنگ یکبرے پدا بندات بیت ۔

بلوچستانءِ راجی حقّانی گوانکءِ چست کنوک و سرمچارانی سروک "رحیم زردکوھی" ماں پھرہ ءَ شھید کنگ بیت ۔ وانندھیں ورنا ماں جیلانی تھا وڑ وڑءَ لٹ و کٹ و بے عزت کنگ بیت انت ۔ چہ لھتےءَ چہ بلوچ دوستیءَ پشومانیءِ اقرار پہ زور گرگ بیت و آھانی سر و چمّ جھل کنائینگ بیت انت ۔ ھما ورنایانی سر چو کہ تپتانءَ لکّ ات و آھانی بالاد جمھوری اسلامیءِ ناھارانی گرّگ و نھیباں چنڈینت کت نہ کت انت ، تیرگوار کنگ بیت انت ۔ شھیدیں ورنایانی گیچن کتگیں جسدانی ھر تیرےءِ بدلءَ چہ آھانی مات و پتاں ھزار "تومن"(رندا کہ تومنءِ ارزش کم بیتگ ات، گشنت کہ ھر تیرے ءِ بدل دہ ھزار تومن کنگ بیتگ – مروچاں چار راھانی سرا کرینانی سرا درنجگ بینت)۔ دنیاءِ تھا دگہ جاھاں چشیں مثال گندگ نہ بیت (من نہ اشکتگ و نہ ونتگ ) ۔

بلوچ وانندھیں ورنایانی مزنیں بھرےءَ سواسانی پادءَ کنگءِ ھم موہ نرست و دران ڈیہ بیت انت ۔ بازینےءِ بھت یار بیت و چیزے وھدءِ دلسیاھیءَ پد ماں آپسرےءَ رست انت ۔

منءَ شرّ یاد انت، 1980ءِ دھیءِ اولسرا ، مئے رودرآتکی بلوچ برات و سیاسی جھدکار ، ایرانءِ اسلامی جمھوریءِ خلافءَ مئے گپّانی منگءَ ھچّ پیما تیار نہ اتنت ۔ آھانی خیالءَ سیاہ پاگانی رژیم سامراجءِ دشمن ات۔ سامراجءِ دشمن بزاں لگتمالیں راجانی دوست !!!

بلے پہ بژن و اپسوز باید منگ ببیت کہ مئے کتہ کاریں سیاسی دانشوراں جھانءِ سیاستءِ میدانءَ رد وارت ۔ دمگءِ کمونیست پارٹیانی دستءَ ریپینگ بیت انت ۔ سیاھپاگیں ملّا چہ درستاں شیوارتر ، وھدیکہ گوم اش راست بیت ، ھمے کمونیست - کہ آھاں راجی زرمبشانی خلافءَ جمھوری اسلامی حمایت کتگ ات – ھما حدّءَ ذلیل کت انت کہ بیان کنگ نہ بیت ۔ آھانی آہ و پریات عرشءَ سر بیت ؛ بلے نوں دیر بیتگ ات ، اپوزیشن سرین پروش و ودگ ودگ ات ۔ آ کہ چہ پاھو و زندانءَ رکّتگ ات ، یا دراں ڈیہ ات و یا وتی لوگءِ کنڈءَ چیر و چُرز ات ۔ ایرانءِ جمھوری اسلامی رژیمءِ عمرءِ دراجکش بیگ پہ ایردستیں راجاں – خاص بلوچءَ – بید چہ تباھی و بربادیءَ دگہ ھچّ پیمیں بانجیگے نیارت و نئیکہ آرگءِ تُشے امیت ھست ۔

مروچی کہ ایرانءِ اسلامی جمھوری ماں جھانءِ سیاستءِ پڑءَ ، ایوک و تنھا و "رسوا بر سر بازار انت"، من نزاناں چون و پرچیا مئے لھتے دانشوریں بلوچ چشیں بے آپ و جاندریں رژیمءِ عیبانی پوشگءَ وتی لانک بندءِ بُشءَ لیگار کنگءَ انت ۔ اگاں ایرانءِ واکداریں راجءِ دانشور چہ سلطنت طلباں ( پیسریگیں شاھی رژیمءِ حامی ) بگر تا جمھوریخواہ و کمونیست ، امریکا و رو ایرشتی ملکانی مخالفتءَ کنگءَ انت و اے دگہ ایردستیں راجانی ، راجی زرمبشاں امریکاءِ جنگولی سیاستءِ پندل زاننت ، مردم ھبکّہ و حیران نہ بیت ۔ چیّا کہ زاناں کدی آ پہ بلوچ ، کرد، ترکمن، ترک ، عرب و ۔ ۔ ۔ ءِ برابریں حقءِ منوک بیتگ انت ؟ ھر وھد برابریءِ توار چست کنگ ببیت ، دری واکانی پندل و ملک دشمنیءِ لیبل لچّینگ بیت انت ۔ بلے پرچیا مئے لھتے دانشور گوں آھاں ھمتوار انت ؟

- زاناں آ، سدانی حسابءَ نوک ورنایانی ماں چارراھانی سرا پاھو دیگءِ حالاں سھیگ نہ انت !

- بلوچی زبان و کلچرءِ بیگواہ کنگءِ حکومتی پندلاں سرپد نہ انت !

بلوچ راجءِ پجّار و ھستیءِ ولگوج کنگ و آھنڈ بُرّیءِ کوششاں آگاہ نہ انت !

مروچی ایرانءِ حکومتی کارندہ جار جننت کہ ماں بلوچستانءِ کالج و زانتجاھاں ھپتاد ھزار درس وانوک وانگءَانت ۔ بلے نہ گشنت کہ چہ اشاں چنت بلوچ انت ، چیّا کہ بلوچانی حساب اشانی تھا چہ دو فیصدءَ ھم کمترانت ۔

مئے ھما دانشور کہ گوں وتی الماسیں قلمءَ جمھوری اسلامیءِ ستا و توصیفءَ قصیدہ نبیسنت و ھنچو شون دینت کہ جمھوری اسلامیءِ رژیمءِ برکتءَ بلوچستان بھشت برین انت ( تاکید چہ من ) و بینگ و شیرءِ جو رُمبگءَ انت ( بچار بلوچستان ایکسپریسءِ شونگال ،مارچ 2007ءِ گڈی روچاں،پکائیں روچ یاد نہ انت)، یک دمانے چمّاں پچ بکننت ، امنسٹی انٹرنشنلءِ رپورٹاں بچار انت ۔ اگاں امنسٹیءِ گپّاں نہ منّ انت، چہ زاھدانءَ ایرانءِ مجلسءِ نمایندہ حسین علی شھریاریءِ گپّاں باور بکننت کہ گشتگ اتی :" ۔ ۔ ۔ دگہ ھپت سد نفرءِ پاھوءِ حکم دیگ بیتگ ۔ ۔ ۔ "(بزاں ماں بلوچستانءَ) ۔

- دوازدہ سالگیں بلوچ دُتگ " رویا سارانی"ءِ انگت ھونانی نمب ھشک نبیتگ کہ حال شنگ انت ، معصومیں شھیدءِ قاتل تبرئہ بیتگ۔

- ما را حال رستگ کہ بلوچستانءِ تیاب دپی دمگءِ زمیناں – خاص چہ چھبارءَ بگر تا گوترءَ – جمھوری اسلامیءِ وزیر و ملّا وتی نامءَ ثبت و سند اش کنگءَ انت ۔

- بلوچستانءِ مزنیں شھراں بلّ ، کسانیں شھراں چو کہ "راسک"ءَ شیعہ میتگ جوڑ بیتگ و بیگءَ انت ۔

چشیں دگہ ھزاراں مثال ھست انت ( اگاں نبیسگ ببنت ،مثنوی ھفتاد من کاغذ شود، کہ چہ اے نبشتانکءِ وس و حدّءَ در انت ) کہ بلوچستان جنتءِ درور شون دیگ بیت ، بلے پہ بلوچءَ نہ ۔

اگاں بلوچ دشمنی ھمے رشتءَ دیما بہ روت و آییءِ دیمگیری مبیت ، گڑا آ روچ دیر نہ انت کہ ایرانءِ سیاھپاگ ھور گوں ایرانءِ اے دگہ چپّ و راستیں شوونیستاں ، بلوچءِ بیگواھیءَ چاپ و چوگان کننت ۔ آ وھدی گڑا نئیکہ مئے رودرآتکی دانشور و سیاسی جھد کاریں براتانی بش بش و اپسوز کارے کنت و نئیکہ مئے یوروپ و امریکاءِ سارتیءَ ٹنٹرتگیں پیر و پُھکیں ھڈ ، سرینءَ تچک و میانءَ بست کت کننت ۔

گڑا واجھاں ، بانکاں !

دمگءِ جاوراں شرّیءَ بچار ات و پہ بلوچ و بلوچستانءِ سیتءَ چہ آھاں کار گرگءِ کوششءَ بکن ات نئیکہ بلوچءِ ازلی دشمنءِ رکینگءَ ۔

بچار کہ نمیرانیں مولوی عبداللہ روانبدءَ چون وش گشتگ :

انّوں شما را فرصت انت

تھم کارءِ وشیں مدت انت

اسماعیل امیری

18/10/07

amiriism@googlemail.com

اااا ا