ھینّاریں چمّ

واب ات آگھی ءَ ،

آگھی ءَ دیست ای واب !

ترانگاں مانترّینت

زھیرواریں گیرانی ۔

شکّلیں یاداں ھمباز کت

ترانگ کسانیءِ

لئیب و گوازی ھمگنگلاں گوں ۔

نرمیں سِکاں ، شپادیءَ جُتک بندگ

گرمیں نیمروچاں ، سِچاپیں گولمءَ جان شودگ

پہ بَلّیءِ سِچکانءَ ، ریدگیں پیشّءِ بُرّگ

بَستکءِ کوشّ کنگ ، کونلءِ چوسّگ ؛

ھیرتانی نرمیں دودگ ، ترانج کنگ و سر دیگ ۔

واب آگھیءَ

مارپیچیں کور ، جمپ ، کوہ و گر

موج جنان پراھیں آسمانءَ درپشوکیں سھیل و نگرھیں ماہ ۔

گلدرّ و دانیچ لاپءِ درمان

ایشرک ٹپّءِ زیمیگ ۔

ناہ و شیلّانچ رگ بند و سبارگ ،

جھکابوستءَ چہ دور

آرام و سادگیں زند ،

بے آسراتیں ، بلے آزاتیں زند ۔

واب آگھیءَ

گیرانی گورم چو ایر پرشت انت تیابءِ ھیالءَ

گدام ات وتی ، کاشیں کڈل وتی

شیپ و کورءِ جو وتی

کلگءِ برنجی ڈگار و پیمازءِ کرت وتی

میتگ و ھلکءِ پراھیں آسمان وتی

شپانک وتی و مالدار وتی

جیڑہ و شکر رنجی ، غم و شادہ وتی

کماشانی دیوان و ترانءِ لبز وتی ۔

واب آگھیءَ

سیری دود ، شادھی نازینک ، شعری الھان بلوچی

شوانگءِ نلءِ زیمل بلوچی

سرحدءِ لیکو ، مکرانءِ زھیروک بلوچی

بلوچءِ گوشءَ

بلوچ زرءِ چولانی زرمبشت بلوچی

دشت و باھوءِ ایرآپگانی چینک چنوکیں

کپوت و شانتلانی کوکو بلوچی

گراں ایر رچوکیں ، چمگانی نژنژ بلوچی

مُگلمانی و دھلانی دریمبگ بلوچی

سرودءِ تاھیر دیوکیں ساز بلوچی

زر و کوچگ بلوچی

کوہ و کنڈگ بلوچی

ڈیہ و سرڈگار بلوچی ۔

واب آگھیءَ ،

واب آگھیءَ

سِست ارسی ترمپے

چہ ھینّاریں چمّءَ

ھیکّارگے جت زھیرنالیں زردءَ ۔

بلوچے دور کپتگ

ھپت زر گواز کتگ

رمبینتگ ملک وتی ، راج وتی

لاچاریءَ ، بے واریءَ !۔

گٹ گیر انگت باگانی کلی

پاھوءِ لوپءَ شکر ورنا

سیگی جامگءَ ھنّی رجیں بانور

ظلمءِ سیاھگواتءَ مانشانتگ ۔

واب آگھیءَ ،

واب آگھیءَ

درپش کت ھینّاریں چمّءَ

ارسانی رگامے رتک

آپی دات امیتءِ نھال

کٹیت ظلمءِ سیاھیں شپ

آسیت نگرھیں بام

آسیت نگرھیں بام ۔

مسکان بلوج

22/08/2007