بلوچی مۓ وتی شھدیں زبان انت

ھورانی اولی ترمپ

اسماعیل امیری

25فروری 07 20

چارشنبھ ،چاردہ فروری ءَ ماں زاھدان ءَ ایران ءِ انسان دشمنیں رژیم ءِ پاسدارانی بس ءِ سرا بلوچ سرمچارانی ارش و گوں بمب ءَ آس دیگ ءِ حال وت چو یک بمب تراکے ءِ وڑا ماں دنیاءِ میڈیاءَ شنگ بیت۔بلوچاں ھچ شک نیست ات کہ ایران ءِ حکومت چو ٹپیگیں ھڑکھی کچک ءَ بلوچانی سرا گوں وتی پورھیں واک و توان ءَ الگار مکنت ۔بازیں بلوچے گرگ و بندیگ کنگ بیت۔یکے چھ اے بیگناھیں بندیگاں ،ایران ءِ بے عدالتیں دادگاہ ءَ -جھانءِ دادگاھانی تیزرفتاریءِ رکارڈ پروشت- پنچمی روچءَ پاھو دات۔

ایرانءِ بے عدلیں دادگاہءَ ،حکومتی پاسدارانی چھ مرگءَ شیرءِ دوشگ و اشترءِ سرءَ کانٹ ردگءِ گپّ منّ ات و ورنائیں نصراللھ شنبھ زھیءِ جرم ثابت کت و سر عام پاھو دات۔ایرانءِ سیھ دل و سیاہ پاگیں واکدار،ھما کوردلیں ایرانیانی کھ آھانی مجگ گوں راجدشمنی و بلوچ دشمنیءِ سیاھیں صابونءَ شودگ بیتگ ،باور کنائینگءَ سوبین بیت کھ دشمنے پاھوءَ درنجگ بیتگ۔

ایرانءِ اسلامی جمھوری رژیمءِ انسان دشمنی چھ ھچ کسءَ چیر نھ بیتگ و نئیکھ جھانءِ اے دگھ حکومت وانسانی حقوقءِ گلّ و ھوربند چھ آییءِ کرداں نزانتکار۔ ماں اے رژیمءِ عمرءِ گؤستگیں سرجمیں بیست و ھشتیں سالاں چشیں سالے نبیتگ کھ پھ انسانی و راجانی حقانی پادمالیءَ آییءِ کرد ایرجنگ و محکوم کنگ مھ بیت۔

بلے بھمانگی و حیرانی گپےات،وھدیکھ ماں پانزدہ فروریءَ سکیوریٹی کونسلءَ ایرانءِ رژیمءِ پلّو داشت و پاسدارانی بسءِ بمب جنگ محکوم کت۔ مستریں اپسوز چھ سکیوریٹی کونسلءِ اے جارتاکءَ ایش انت کھ بلوچ راجءِ حقانی پادمالی و بلوچانی سرا ظلم و زوراکیءِ نیمگا ھچ اشارہ کنگ نبیتگ۔ ھر کس زانت ماں ھمے گؤستگیں یک سالے ءِ دورانءَ ایرانءِ حکومتءَ چھ سد بیگناھیں بلوچءَ گیش، وتگڑیں جرمانی گناہءَ پاھو داتگ و یا جتگ و کشتگ۔

ایرانءِ واکداراں ،بلوچستانءِ سرڈگارءَ مدام آس گورتگ و پھ بلوچانی چک چین کنگءَ چھ ھچ پیمیں ناروائین و راجدشمنیں پالیسی و کاراں چک و پد نبیتگ انت۔ بلے سکیوریٹی کونسلءِ اے جارتاک چو بیرےءَ بلوچانی سرا ایر آتک۔روایرشتی بلوچستانءِ سیاسی گلّ و ھوربند ژامبلینت انت ، وانندہ و زانتکارانی مارشت جکسینت و جھ سرّینت انت۔ پھ یونایتد نیشنءِ کماش و سروکءَ کاگدانی نبیسگ چھ ھر نیمگا بنگیج و بلوچانی توار و پریات و چھ آییءِ یک طرفھ و جانبداریں جارتاکءَ نھ وشّی پجّارینگ بیت انت۔ چھ اے کاران یکّے یو انء کماشءِ نامءَ روایرشتی بلوچستانءِ پنچ سیاسی ھوربندانی ھوریں کاگد انت۔

امیت انت کھ اے ھوریں کاگد چو ھنگامی ھورانی اولی ترمپاں ببنت و گوارگءَ بند مکن انت تا کھ وت پجّاریءِ کؤر ھار بکنت ،وت واجھیءِ ڈگار پربند و وت مستریءِ کشار میزران ببیت۔

بلوچی سبز بات