بلوچی مئے وتی شھدیں زبان انت

ھونءِ ارزانی !!!

اسماعیل امیری

وھدے گشنت کھ ملکے جمھوری انت ، گڑا بزاں اوداں گچین کاری بینت و مردم وتی نمایندگاں گچین کننت ۔ گچین بیتگیں نمایندہ ، مھلوکءِ گوانک ، حقانی پد جنوک ، وتی دمگءِ دوستواہ و آبادی و دیمرویءِ لوٹوک و جھد کنوک بیت انت ۔ ھمیش انت رسم و ھمیش انت راستیں گپ کھ عوامءِ نمایندہ پھ وتی مردماں باید بکنت ۔ پھ مھلوکءِ اڑ و جنجالانی گیشوارءَ لانک ببندیت و دیما در بکپیت ۔ وتا را چھ عوامءَ بزانت و آھانی سکیاں وتی سکی و سوری بھ گشیت ۔ مردمانی وشیاں شادہ بکنت و اندوھاں ، غم ۔

جھانءِ تھا ، ایرانءِ اسلامی جمھوری ھما ملک انت کھ نامءَ وَہ جمھوری انت بلے چھ جمھوری رھبندانی ھبیلءَ ھم نھ شگوستگ ۔ نام گپتیں گچین بیتگیں گیشتریں نمایندہ نھ تیوکا مردمانی دوست و دلسوچ نھ انت بلکیں عوامءَ وتی سیستمءِ دشمن زاننت ۔ یکے چھ ھنچیں بلوچ دشمنیں چھ زاھدان - روایرشتی بلوچستانءِ بنجاہ - ءَ ایرانءِ مجلس - نیشنل اسمبلی - ءِ باسک ،" حسین علی شھریاری" انت کھ جار جنت و گشیت کھ دگھ ھپت سد بلوچءِ پاھوءِ حکم دیگ بیتگ ۔ بلے اے ظالم انگت ھم بلوچستانءِ انتظامیھءِ سرا برانز گریت و دنتان درشیت کھ پھ بلوچانی سرکٹ و کشت و کوشءَ سست انت ۔

ایرانءِ راج دشمنیں واکدار و آھانی شیپور و سرناءِ دموکاں ، مدام بلوچ دشمنیءِ ساز جتگ و بلوچءِ پرسءَ شادہ کتگ و نَچّ اتگ ۔ چھ انوشیروان ساسانی - لج نکنت ھماواں کھ آییءَ عادل گشنت - ءَ بگر تا انوگیں بیست و یکمی سدیءِ نام گپت و وتگڑیں جمھوری اسلامیءَ ، چھ ھچ وڑیں انسان دشمنیں کرد و کارپداں چک و پد نھ بیتگ انت ۔

ایرانءِ واکدار شریءَ زاننت کھ بلوچ راجءِ درمیانءَ آھاں جاہ نیست ۔ ھنچو کھ آھانی فکر و سسّا بلوچ دشمنیءِ بنیادءِ سرا ایر انت و عملی بیگءَ انت ؛ بلوچ ھم سرپد بیتگ انت و زاننت کھ پھ وت واجھی و وت مستریءِ رسگءَ بید چھ جد و جھدءَ دگھ راھے نیست ۔ ماں بلوچستانءَ ، راجی زرمبش روچ پھ روچ دیما روان و جد و جھدءِ رد بزتر بیان انت ۔

ایرانءِ واکدار چھ بلوچ راجءِ بر حقیں جھدءَ بُن گپتگ انت و زانگءَ انت کھ راجانی زرمبشءِ آس ، آھانی ظالم و ناروائیں رژیمءِ لدءَ کپتگ ۔ جمھوری اسلامیءِ رژیم گوں سدانی سد بلوچ ورنایانی پاھو دیگءَ ، لوٹیت یک نیمگےءَ بلوچ راجءِ دلءَ ترس و بیم دور بدنت کھ آ پھ بلوچءِ کشت و کوشءَ ھچ پیما چک و پد نبیت و آ دگھ نیمگا شون بدنت کھ پھ وتی حکومتیءِ برجاہ دارگءَ ھر دابیں غیر انسانی کرد آییءِ فلسفھءَ روا انت ۔ بلے ماں انسانی چاگرداں و خاص اے دورءَ شریءَ ثابت بیتگ کھ ظلم و زورءِ سیاست تا دیرءَ رَو نکنت و پادار نھ انت و مردم چھ وتی انسانی و راجی حقانی گرگءَ دست کش نبنت ۔

زوراکیں واکدار باید بزاننت کھ بلوچ راجءَ وتی اے تاسُپیں بچ چو ساہ و دیدگاں دوست انت و آھانی پاھو دیوکاں پھل نھ کننت ۔ چون بخشگ بنت وھدیکھ آھانی گورا ھیسی سرانی بھا دانکے ھم نھ انت۔