|
بلوچستانءِ تاریخی بیرق (پرچم)
اسماعیل امیری
 ھرچ
ملک و راجےءَ وتی شناخت و پجارے ھست کہ چہ دگہ ملک و راجانی پجّارءَ
جدا و دگر انت ۔ ھرچ ملک و راج گوں وتی ھمے شناختءَ پجارگ و زانگ بینت
۔ بلوچ ڈیہ و بلوچ راجءَ ھم وتی پجار ھست انت کہ چہ ھمساھگیں راج و
ملکاں جدا انت ۔ بلوچ ڈیہءَ وتی جغرافیا ، آب و ھوا ، تاریخ و تمدن و
جاہ منندیں راجے ھست ۔ بلوچ ڈیہءِ جہ منندیں راج ، بلوچ انت و پمیشا
بلوچستان گشگ بیت انت ۔
بلوچ راجءِ پجّارءِ اھمتریں پادگ ، آئیءِ ملک ، زبان ، دود و ربیدگ ،
تاریخ و ھما نشانی و سیمبل انت کہ آھانی وسیلہءَ بلوچ وتا را ماں جھانءَ
پجّار کنائینت و دگہ ملک و راجاں شون دات کننت ۔
پہ بلوچ ءَ اے بژن و ارمانی گپے انت کہ آئی ءِ پجّارءِ بنیادی پادگ
بزاں ملکءِ وت مستری و راجی آجوئی چہ آئیءَ پہ زور پُلگ بیتگ ۔
پہ بلوچءِ راجی پجارءِ بیگواھیءَ، زوراک و راج دشمنیں واکدار چہ ھچ
وڑیں انسان دشمنیں کارپداں چک و پد نبیتگ و انگت ھم پہ بلوچءِ بیگواھیءَ
وڑ وڑیں پندل سازگءَ انت ۔ پہ چشیں پندلانی دیمگیری و پروشءَ ، ضروری
انت کہ مئے دابیں ایردستیں راج وتی راجی پجّار و شناختءِ درستیں تک و
پھناتاں پہ شری دیما بیار انت و سھرا بکننت ۔ وتی تاریخ و فرھنگءِ سرا
پھر بہ بند انت و وتی راجی پجّارءِ سیمبل و چیدگاں نہ ایوکا ماں وتی
راج و ملکءِ تھا بلکیں میان استمانی پڑءَ شنگ و پجّار بکنائیننت ۔
مئے ھیالءَ بیرق ( پرچم ) ھم ملک و راجانی شناختءِ ھما سیمبل و نشان
انت کہ گوں آئیءَ پجّاہ آرگ بنت ۔ ملکانی وت مستری و آجوئی و یک ملکےءِ
مردمانی راجی حیثیتءِ شون دیوک ، بیرق انت ۔ راست انت کہ اے وھدی مئے
ملک و راج ایردست انت ، ونڈ ونڈ انت ، مئے راجی آجوئی پُلگ بیتگ ؛ بلے
ما زانیں کہ ما را ملکے ھست کہ تاریخےءِ واھند انت ۔ بلوچءِ تاریخءِ
دراجیءَ چہ " رند-لاشار"ءِ کنفڈریسیءَ رند ، نصیرخان نوری ( ھژدھمی سدی)
ھما بلوچ واکدار ات کہ اولیگیں رندءَ کم و گیش سرجمیں بلوچ راج یکیں
بیرقءِ چیرا آورت ۔ بلوچ ڈیہ و راجءِ بیرق – دو رنگیں سبز برزءَ و سھر
جھلءَ ،میانجینءَ اسپیتیں نوک ماں سھریں زمینءَ کہ نوکءِ دوئیں سر تا
سبزیں زمین ءَ سر بینت و اسپیتیں استار نوکءِ برزءَ ، نیم ماں سبز و
نیم مان سھریں زمینءَ ؛ نوکءِ تھا لا الاہ اللہ و محمدالرسواللہ و
استارءِ تھا الّہ و اکبر نبشتہ انت- ماں میریءِ کلاتءِ سرا لک کت و چہ
ھما وھدءَ بلوچ ڈیہ و بلوچ راجءِ شناختءِ سیمبل و نشان جوڑ بیت ( البت
لھتے گشنت کہ چہ نصیرخان نوریءَ پیسرتر ھم ھمے بیرق بیتگ ) ۔
وھدیکہ انگریزاں(بریتانیاءِ فوج) ماں 1839 بلوچستانءِ بنجاہ " کلات "
ءِ سرا ارش کت ، گڑا خان کلات مھراب خانءَ وت بیرق زرت و جنگءِ میدانءَ
ایر کپت و شھید بیت ۔ گوں انگریزانی درآیگ و روگءَ ماں 11 اگست 1947
بلوچ سروک و خان کلاتءَ بلوچستانءِ آزاتی و وت مستری منائینت و 15 اگست
1947ءَ ،خان کلات میر احمد یارخانءَ رسمی وڑا آزاتیءِ جارجت ۔
بلوچستانءِ سیاسی تاریخءَ نوکیں دور گوں ھما راجی بیرقءَ بنگیج بیت ۔
بلوچستانءِ تھا گچین کاری بیت و بلوچستانءِ تاریخءَ اولیگیں پارلمان رد
و بند دیگ بیت ۔ بلوچ راجءِ اولی پارلمانءَ ھما بیرقءِ چیرا دیوان کت ۔
وھدیکہ پاکستانءِ فوجءَ ماں 6 اکتوبر 1958 ءَ ،بلوچ حکومتءِ بنجاہ
کلاتءِ سرا ارش کت ، خان کلات دستگیر و بلوچستانءِ بیرق چہ کلاتءَ جھل
ایر گیتک ، گڑا نوروز خان گوں وتی ورنائیں بچّ و ھمراھاں پہ بلوچ ڈیہ
ءِ آجوئی و وت مستری و راجی پجّارءِ برجاھیءَ سلاح چست کت و شھید بیت
انت ۔
منی ھیالءَ ما باید ھمے بیرقءَ کہ نصیرخان نوریءَ سرجمیں بلوچستان آئیءِ
واکءِ چیرا یکجاہ کت ، شھید مھراب خان و نوروز خانءَ پہ آئیءِ برز
دارگءَ وتارا ندریگ کت ، پہ بلوچستانءِ تاریخی بیرقءِ حیثیتءَ پھر بہ
بندیں۔ |