یک دگہ پندلے

اسماعیل امیری

انگریزانی سازتگیں پندل ، "انگریز" و" پرشیا"ءِ کاگدءِ سرا رستگیں کشک ، مروچی بلوچ سرڈگارءَ سیاہ پاگانی حکومت کنکریٹ دیوالءَ بندگ و بلوچ ڈیہءِ دلبندءَ جِکّ کنان انت ۔ نہ زیک بلوچءَ ،" گولڈ اسمیت لائن" منّ اتگ ات و نہ مروچی بلوچ ، سیاہ پاگانی کنکریٹ دیوالءِ بندگءَ وشّ انت ۔ زیک بلوچءِ نمایندہءَ ، انگریز ، پارس و بلوچءِ سیمسرانی گیشینگءِ دیوانءَ ، سھرائیءَ گشتگ ات ؛ اے ملک بلوچی انت ، بلوچءِ ڈیہ انت ، انگریز و پارسءَ کئےءَ حق داتگ کہ مئے ملکءَ بھر و ونڈ بکنت ۔ بلے بلوچ نزورتر ات ، انگریز و پارس زوراکتر و زانتکارتراتنت ؛ چالاکتر و روباہ تراتنت ۔ بلوچ سردار و حاکم ناتپاک اش کتگ اتنت ۔ بلوچ سرزمینءِ دلبندءَ زوراکیں بھر و بانگءِ کشکءِ رندگءَ سوبین بیت انت ۔

کشک کاگدءِ سرا رندگ بیتگ ات، بلوچءِ ذھن نہ چشیں بھر کنوکیں کشکےءِ منوک ات و نہ آییءَ آ روچءِ پندل گوں بانداتیگیں چمّاں دیست کرت کتگ ات ۔ پنجگورءِ نشتگیں گھارءَ کجا زانتگ ات کہ یک روچے ھنچیں ھم کئیت کہ پہ وتی بمپشتءِ نشتگیں براتءِ گندگءَ دگہ درآمدانی اجازتءِ محتاج بیت انت ۔ ردیگءِ شوانگءِ گمانءَ ھچّ پیما نیاتکگ ات کہ ھنچیں روچے ھم کئیت کہ آییءِ رمگ چہ آییءِ میتگءَ چارگام آ دیم تر پہ چرگءَ شت نکنت ۔ بلوچءَ ھچبر اے فکر کتگ ات کہ "ملا رگام واشی" ءِ شعرانی الھان گوں کنکریٹ دیوالءَ ٹکر انت ! "سدّن"ءِ مجگءَ اے ھیال آتکگ ات کہ "باھو"ءِ ایرآپگانی چینک چنوکیں کپوت و آییءِ مھرانی کلوہ بروک ماں سیاہ پاگانی چیر کتگیں سیمی ٹٹءِ دامءَ کپیت و زدگ و یا آھانی تیرانی آماچ بیت !!

زیک ، اے درست چہ بلوچءِ وھم و گمانءَ در اتنت ۔ بلے مروچی من و تو ، زوراک و درآمدیں واکدارانی پندلاں زانیں و زوراکیاں ماریں ۔ ھر شھر و دمگ و میتگءَ باید اے پندل پاشک کنگ ببنت ۔ چہ واکدارانی مکر و رپکاں مردم سھیگ و سرپد کنگ ببت ۔

ایرانءِ بلوچ دشمنیں واکداراں دنیا سر زرتگ کہ اے دیوال پہ ملکءِ امنیت و" ڈرگ مافیا"ءِ دیمگیریءَ بندگ بیگءَانت ۔ گوں ھمے دروگیں تبلیغاں چہ "تپاکیں راجانی ھوربند” UNO)) و "یوروپین یونین"ءَ زرّ ھم گپتگ ۔ ما و شما شرّیءَ زانیں کہ ڈرگ مافیاءِ کاروان گوں ایرانءِ حکومتی سلاحبندانی ھمکاریءَ گیشتر چہ دگہ راھاں ، ایرانءَ روانت و چہ اوداں "ترکیہ" و دگہ ملکاں و گیشتر "یوروپ"ءَ راہ دیگ بنت ۔

بلوچستانءِ دوئیں نیمگءِ سیاسی گلّ و اے دگہ راجی و لبزانکی ھوربند باید پہ "تپاکیں راجانی ھوربند"، یوروپ و امریکاءِ حکومتاں ، سیاسی و انسانی حقوقءِ گلّ و ھوربند و سماجی ھوربنداں کاگد نبشتہ بکننت و ایرانءِ حکومت و واکدارانی چُشیں رپک و پندلاں پاشک بکننت ۔ من زاناں کہ روایرشتی بلوچستانءِ سیاسی ھوربنداں یک و دو ھنچیں کاگد نبشتگ و پہ UN ءَ دیم داتگ و ھمے پیما رودرآتکی بلوچستانءِ لھتے سیاسی سروک و کارکنوکاں ھمے دیوالءِ خلافءَ گپ جتگ ۔ بلے اے بسّ نہ انت ، باید اے بابتءَ گیشتر کاگد و کرّاچ ببیت و مدام بلوچءِ بزگی و واکدارانی زوراکی و بے رحمی جھان( خاص امریکا و یوروپین یونین)ءِ حکومت ، سیاسی سروک ، انسانی حقوق و سماجی گلّ و ھوربنداں گشگ و سر کنگ ببنت و چہ آھاں لوٹگ ببیت کہ چہ بزگیں بلوچءِ برحقیں لوٹاں پشت پناھی بکننت ؛ آ باید سرپد کنگ ببنت کہ بلوچ چہ وتی راجی و انسانی حقاں دگہ گیشیں چیزے لوٹگءَ نہ انت ۔ ھما انسانی و راجی حق کہ مروچی سرجمیں متمدّنیں انسان و ملک آییءِ منوک و لوٹوک انت ۔