تپتان ءِ گڈی سرگال

(اولی بھر)

اسماعیل امیری

" ما گوں یاتی ، لال رازیں ، چو جگرءَ خون کرتگ ات

سموّ ءَ پہ توکلی نہ ، نئے کہ مجنون کرتگ ات "

کریم تھل

مروچی بلوچ ڈیھءَ ، ھر نیمگا زوراکیں واکدارانی ظلمءِ سیاھیءَ مانشانتگ و گوں بلوچستانءِ بچانی ھونءِ ریچگءَ ، ماتیں وطنءِ ڈوبرءَ مُھرداگاں پر داران انت ۔ واکداریں فوجءِ لپارانی پد مئے گلزمینءِ سرا سیاھیں ٹِکّ و پولنگ انت ۔

وتی بلوچی سرڈگارءَ ، بلوچ بیگ جرم انت ؛ بلوچی نبیسگ و وانگ مستریں گناہ انت ؛ بلوچی کتاب و تاکبندانی شنگ کنگ گوں "ایرانءِ اسلامی جمھوری"ءَ غدّاری انت ۔

کمّ و گیش بیست سال پیش ھم ھنچیں جاوراتنت ، روایرشتی بلوچستانءِ بازیں بلوچ ورنا دراں ڈیھ بیتگ اتنت ۔ لھتےءَ وتارا یوروپءَ رسینتگ ات و بازینے انگت کراچیءَ منتگ اتنت ۔ کراچیءِ بلوچانی ادبی کار و جھدانی گندگ و آھانی تھا ھور بیگءَ، چھ اشاں بازینےءِ دلءَ گوں بلوچی زبان و لبزانک ءَ نزیکیءِ واھگ گیش بیت و ماں ادبی کار و جھد ءِ پڑءَ گام ایر کت ۔

ھمے دورانءَ(1987ءِ سالءِ گڈسرا) ماں لندنءَ ، لھتے بلوچاں "بلوچ دود و ربیدگی و پٹ و لوٹی انجمن" جوڑ کتگ ات ۔ اے انجمنءِ جوڑ کنگءَ گیشتر ھما بلوچ پیشگام اتنت کھ پیسرا گوں ایرانءِ نام گپتیں چپی سازمانان (تنظیمان) ھور بیتگ و لھتے انگت ھم پلو داراتنت ۔

ایرانءِ چپی ھوربند(تنظیم) گوں ایرانءِ جمھوری اسلامی رژیمءِ بے رحمیں اولی بیڑءَ پرشت و پروش و یک یک بیت انت ۔ بازیں وانندھیں بلوچے کھ گوں ھمے تنظیماں ھور و بندوک اتنت، دراںڈیھ بیت انت ۔ اشیءِ آسرءَ بازیں بلوچ ورنا چھ ھمے چپی ھوربنداں نا امیت و بلوچستانءِ راجی زرمبشءِ نیمگا آتک و ھور بیت انت ۔

لندنءِ "دود و ربیدگی و پٹ و لوٹی انجمن" ءِ جوڑ بیگءَ پد ماں کراچیءَ ھم ، روایرشتی بلوچستانءِ ورنایاں گوں کراچیءِ جھ منندیں لھتے بلوچانی کمک و دلبڈیءَ ھمے یکیں نامءَ انجمنے جوڑ کت و لندنءِ انجمنءِ بن رھبند ھم گوں لھتے کمّی و گیشیءَ منّ ات ۔ چو زانگ بیت کھ گوں انجمنءِ جوڑ بیگءَ ماں کراچیءَ بلوچی لبزانکی جھداں نوکیں ساھے مان بیت و جوش ودّاتگ ات ۔ ماں کراچیءَ بلوچی وانینگ ءِ کلاس بنگیج بیت انت و وانینگءِ کار واجھ صبا دشتیاری ، عابد آسکانی و غلام محی الدّین میار ءَ وتی کوپگاں زرتگ ات۔

انجمنءِ یک دگھ مزنیں کارے ، جوڑ بیگءِ اولی ماہ ءِ تھا بزاں فروریءِ 19ءَ مزنیں دود و ربیدگی و لبزانکی دیوانے ءِ برجم

کنگ ات ( اے دیوانءِ سرجمیں حال ماں تپتان ءِ اولی تاکءَ شنگ بیتگ ) ۔

سئے سال و سئے ماہ ءِ دیریءَ پد ، من 1988ءِ مارچءِ گڈ سرا ، کراچیءَ واترّ بیتاں ۔ آ وھدی ، "بلوچ دود و ربیدگی و پٹّ و لوٹی انجمن" پیسرا اڈ بیتگ ات و یک بلوچی تاکبندے " تپتان " ءِ نام ءَ شنگ کنگءِ چن و لانچ ات ۔ چھ منءَ لوٹگ بیت کھ انجمنءَ ذمھ داری بزیراں و تپتان ءِ رد و بند کمیٹیءَ ھور بباں ۔ اے پیما من انجمن و تپتانءِ رد و بند کمیٹیءِ باسک بیتاں ۔

1988ءِ جونءِ ماہ ءَ ، انجمنءِ اولی مزن دیوان - چھ جوڑ بیگءَ پد- برجم بیت ۔ من مارات کھ انجمنءِ بازیں باسکاں ، انگت وتارا چھ ایرانی نام گپتیں چپی ھوربندانی ( تنظیماں ) پروش وارتگیں فکر و سیاستءَ پھکا نھ سستگ و بلوچی لبزانکی و دود و ربیدگی کاراں پھ وتی سیاسی فکرانی آماچ کنگءَ ، گر و چیلّءَ گلائیش انت۔ من زانت کھ آھانی چشیں آسناکیں انزار و سیاسی ترانپولی پھ انجمنءَ تانبارانت و آ چھ دود و ربیدگی و راجی زرمبشءِ لوٹ و کاررھبنداں نزانتکارانت ۔ دیوان تا سئے روچءَ دراجکش کنگ بیت بلے سیاسی ترانپولی کنوکانی فکر دیما نھ شت و منگ نھ بیت ۔ آھانی فکرءِ دیما نھ روگ نیمونے بیت کھ آ وتی ھمکاریءَ گوں انجمنءَ کم کنان بکننت ۔

ماں کراچیءَ ، روایرشتی بلوچستانءِ اے دراں ڈیھیں ورنا کم بیان بیت انت ۔ کراچیءَ زندگی سکّ ات، کار و روزگار پھ آھاں نیست ات ۔ لھتےءَ وتارا یوروپءَ سر کت ، لھتے پھ روزگارءِ شوھازءَ خلیجءَ شت و چیزے ھم ناچاریءَ ملکءَ واترّ بیت انت۔

انجمن نزور بیان ات و اے دگھ نیمگا " تپتان " ءِ اولی تاکبندءِ کار سرجم بیان اتنت ؛ چیا کھ ھست اتنت لھتے پھ تپتانءِ شنگ کنگءَ لانک اش بستگ ات و انجمنءِ ھمراھداریءَ کنگءَاتنت۔ ھنچو کھ بلوچء گشتگ :

" سکیّاں برات گوں مرکبءَ کوشت انت"

( دگھ بھرے دیمءِ ھپتگءَ )