( گژن سوگندا پروشیت)

نبیسوک:ناصر محتشمی

وھدیکہ بداون کت،مردک گشگء لگ ات۔

ھرچے کہ بگشان نبیسے؟

ھو واجہ،نبیسان،بلے کمے آپ لوٹان پہ ھداء نامء،سک تنیگان۔

مردکء سکین ترندین و تنزین کندگے جت کہ من چہ وتی جستء شھرت بیتان و گون ھما برزین توارء گشگء لگ ات۔

ھداء نامء،۔ ۔ ۔ ۔ مناپک۔ ۔ ۔ ۔ ! بگر آپانء! پدا جت و توسینت و بد اش آرت منء۔

جستء لگ ات۔ تن پروشت؟

ھو واجہ آپ نہ لوٹان۔وتی دلء گشت اون،پرچے تن نپرشی، و ھداء توار جنگء لگ اتان،بلے ھدا ھم چہ من بے سما ات و منی دپتوارء نہ اشکنگ ات۔مردکء تنزین بچکندے جت و گشتی ۔(ھان بارین زاھدانی مواد فروش) چونین واب گندگاے؟

ھچ واجہ ھداء یاتء کپتان۔ مردک،ھا،ھا،ھاء لگ ات و گشتی۔ ھداء، مناپک ترا ھدا ھست،ھدا ادء نہ انت،اے کلم و کاگدانت ھدا،اشان ترا مدت کن انت،

بزیر،ھرچے گشان نبیس۔

مردکء چم بند چہ منی چمان پچ کت و گشتی دیمء گون دیوالء بہ کن و نبیس و من ھنچوش سرکچ وارت کہ دگہ چنت کس ھم ھست وت مان وتء ھلوت کنگاانت و من وتی دلء جیڑہ اتان کہ بارین من زندگان،پہ ھژاری راستین کوپگ اون سرینت،ھو کوپگ و سری بلے انگت دلجم نہ بیتان،و وتء

جستء لگ اتان کہ چوش ببیت کہ ادء کبرانت و اشان جبرائیل و میکائیلان انت!؟ یک وھدے مردک گشگء لگ ات۔ نبیس کہ منء توبہ انت،دوبارگ چشین کار نہ کنء،ھرچے کہ ادء دیتگ و اشکتء کس نہ گشان۔

نبشت اون، بلے ھمے ھیالء کپتان کہ دپ توبہ کنت،دست نبیسی،بلے ھورکین لاپء توبہ چی انت!من جزمان کہ گژن سوگندا پروشیت،گژنء ھدا

نیست،گژنء دین و ایمان نیست،اشان مپتا منء سوگند دینت،اے ھدا چون کنان،منء ھک نیست کہ بگشان لاپ اون ھورکین؟منء ھک نیست بگشان اے سرڈگارے واھندان،ادء کہ مکھین ماتء لیلک کت منء؟

ھدا، اگر اشان تئ دوستان انت،گڈا تیگ و شیطانء پرک چی انت،چہ تئ بے تواریء منء چہ تئ ھستیء شک ھست انت۔

راستے ادء کسے نیست کہ مدت بہ کنت،الم ھمدا سد برا بہ مران و زندگ ببان و لٹ و بزین شھماتانی اولاک ببان ۔