پاھو

یک تھار ماھین و لنجین شپے ات کہ دھکان چاکر وتا پہ شھرے روگا ساجو کنگاات۔آئیا وتی کوھنین دزمال کہ رنگی چہ بازین کارو چلوپگان بدل بوتگات چست کت و وتی سرا بست۔واسلینےڈبیے چہ دریگا ائر گپت و وتی پادانی ترکی مالش داتنت۔ سواسانی پاد کت وداسی ماں گردنے پشتا مانجت۔برد و چراگی دستا گپتنت ۔ پیش چہ شھرے رھادگ گرگا دیستی کہ چراگے ٹیل ھلاس انت۔دیم پہ ھمبارا شت و چراگی ٹیل مان کت۔ وتی جنینی توار پر جت، او نوھانے مات پادا منا باکسے بدے۔ مں سر شپا ترا گوشتگ ات کہ باکسا منی سرونان ائر کن۔ بلئے بزان تو کرمگوشی کنے ۔ پادا زوت کن منا دیر بوت

نوھانے ماتا گوشت ترا چی انت گون وتی گرونڈ و نرونڈان چکان انت چہ وابا پاد کت۔باکس ھما سر شپا من تئے سرونان ائر کتگ بلے ترا شپ کورک انت گڑا من چون بکنان۔گل ھاتون پاد اتک و باکسی چہ چاکرے سرونان زورت و گوشتی اش انت باکس بزور و دگہ نرونڈگ نجنے چکان واب انت ۔

دھکان چاکرا باکس زورت چراگے پلیتگی برز کت و چراکی روشن کت و دیم پہ شھرا رھادگ گپت۔

چنت جاھا چاکرے پاد گون ڈوکان بوج وارت بلے آ وتا گون ڈوکانے بد دواہ دیگا ھلاس کت و گون مان میاتکیا دیم پہ ڈگاران رھادگ گپت۔

تاسکپلا کہ رس ا ت آپی وتی ڈگارے نیمگا ترینت۔ نرم نرم و گورموش وران آپے رندا روان بوت۔ یکجاھے دیستی کہ آپ گون اھیا گون نھنت۔ واتری کت کہ بچاریت آپ کجام نیمگا سرریچ بیئگاینت! دھکان چاکرا پیشی روچا سکیداد گوشتگ ات کہ وتی ڈگارے گورگا مھر بہ بندیت ۔ چیا کہ جاکرے ڈگار چہ سکیدادے ڈگار برزتر انت و آپ گون بازین دلساھیے اودان سر کپیت۔

شومین سکیدادا بزان وتی ڈگارے گورگی مھر نبستگ ات ۔ چاکرگون گڑنڈگ و بازین زاہ و زکٹے گورگ بست و دیم پہ وتی ڈگارا رھادگ گپت و وتی ڈگارے مینگا لگت۔

ڈگارے آپ دیگا رند دھکان چاکر دیم پہ میتگا واتر بیت۔سرنجدا کہ رس ات پتیلگی چراگ چہ دستئے لگشت و آئے شیشگ (بلپ) تریشگ تریشگ بوت۔بزگین دھکانا بزان شپکورگ انت و شپان ھچ نگندیت۔ مں اے تھاریا ھچ راھے پہ اییا پشت نکپت بید اچ کہ ھمودان بداریت ۔ سری یک جاھے ائر کت وچہ ژندیا دمانے رند واب شت۔ روژناییا کہ ائر دات پاد آتک و دزنمازی گپت و وتی برد و پروشتگین چراگی زورت و دیم پہ مسیتا سرموش وران بیت۔ چاکر کہ چہ دوشیگین بے وابی و آپ و مینان ژند و ژبیل ات، نمازا رند مسیتے یک کونڈیا سری ائر کت و دمانیا رند ھما دگنیاء شت۔

نکنے کہ اے جاھا مزنین مورکدامے ھست انت،بلے کماش چہ دوشگین ژندیا ھنچویا سری ائر کت و دمانیا رند ھما دگنیاء شت۔نکنے کہ اے جاھا مزنین مورکدامے ھست انت،بلے کماش چہ دوشگین ژندیا ھنچو برتگات کہ اے سدا نہ ات کہ ادان مورکدامے ھست۔ دمانے رند موران مسکینین چاکرا برھورت انت۔یک مورے چاکرے گوشا پترت۔دھکانا ھنچین چیتکے جت کہ مسیتے پشتے دیوان کتگین مردمان ھیران و ھبکہ بوت انت۔

یکے چہ اے دیوانے نندوکان ماں مسیتا ماں بیت و تواری پر دات چاکر چاکر ترا چے بوت؟۔ دھکانا دراینت منی چک منا ھچ نہ انت۔ کمبھتین مورے منی گوشا پترت پہ ھمے ھاترا منچیتک جت۔

ورنائین مردا دراینت دھکان بیا برئں مسیتے پشتا پیتاپ گرین۔

دیوانجاھا بازین کماش و ورناے نشتگ ات و بلوچستان و بلوج راجے نوکین وکوھنین جاورانے باریگا گپ و تراں کنگا ات انت۔

یکے چہ اے دیوانے مردمان کہ نامی کریچ ات گوشتی کہ، ریڈیو بی بی سی دوشی مں وتی اھبارا گوشت کہ: مان سربازے کر و گوران جنگے گون ایرانے دولتی سلاحبندین پاسدار و بسیجیان بوتگ و بازینے کشگ و ٹپی کنگ بوتگ انت۔

زیروکا دراینت کہ شرانت، اشان منی ناکوزاتکا مپت و ناھک بیران کت، ھئیبتے برات اش پہ شپ و تھارے ماں وپتگین وابا چہ بشانگہ کشت و برت انگت سر و پدے گار انت۔ اے گجر مئی سرا باز جہ ھدا گیش زلم کنگاانت۔ ھدا اشانا بجنات۔ اے مئے کومے سرا باززلم و زورانسری کنگاانت۔

یکے چہ دیوانےواجکاران کہ نامی ابروک ات درائنتی کہ اوڑہ بنند پہ شھم زیروک، اے کہ گرگ و ماں بندیگجاھان انت،شپکی انت۔

کریچا پہ تروندی پسو دات : کلام ربانی ترا بجنات ، کمبھتین ابروک تو مرچان باز بدل بوتگے۔ تو انگت شریے سرا شپکی وسرمچاری ے دوئین لبز سرپد نبوئگے۔منا اپسوز وسد ھزار اپسوز انت تئین ابروک بیاے چشین گپ بجنے۔کریچے ھبر ابروکا سک تورینت و پدرد کت۔ بلے چے دیوانے مچیا زھرگی نکت، سرپ اے گوشتی کہ من چہ دگرانی دپا اشکتگ۔ دمانیا رند چہ دیوانا پاد اتک و رپت۔

ائیشرکا دراینت کہ اوڑہ من ھن چہ ریڈیو امریکا اشکت کہ ماں زاھدانے کر و گوران جنگے بوتگ، بلوچان گون آر۔پی۔جی زاھدانے گیس بنجاھا پٹینتگ۔پہ منی ھیالا تاں جاھے کہ من اشان پجاھ کاران،اے شپکی نہ انت۔ پر چا کہ منی ترونزھت جانوک کہ ماں نیکشھرے بسیجا انت ماں ھمے جنگا ھور بوتگ۔ زیگین روچا گون من گوشتی کہ اشان گوشتگ کہ ما پہ بلوچستانے وت واجھی ے واستا جنگ کنگاین۔و آ چہ بلوچین بسیجییان کہ گون اے دگہ دواتی سلاحبندین پاسداران ھور بلوچانی جنگے رندا ات انت، لوٹ ات اش کہ گون ما ممڑ ات۔ما سرمچار ایں۔ ما پہ شمے حق و حقوکانے گرگے واستا جنگ کنگ این۔

زیروکا ھبرے تھا دور کت و گوشتی جی ھنچوش انت منی واجھین برات۔ما چون بکنین مئے پریاتاں کے گوش داریت؟مئے دانشورین و زانتکاراین بلوچان وت مان وتا ناتپاک انت۔

ایرانے واکدارانی مدیمی ٹگی و پلینڈی ھمے بوتگ کہ آھانا گون وت مہ وتا جنگ بدینت و تاں اے ساھتا کامیاب بوتگ انت۔گون ھمے مکر و ھیلھان مئے کوما کوشگ انت۔برے گوش انت بلوچ شپکی انت۔برے گوش انت بلوچ وتی جنین چکان گون ڈنی ماکان بھا کن انت، برے گوش انت کے ڈنی ملکانی اجنٹ انت!؟۔

براتان واجھان، بلوچ ابید چہ تپاکیا کامیاب بوت نکنت۔ من امیت کنان کہ بلوچ دانشور و زانتکار گون یکدکرا تپاک ببنت و وتی جھدا گون موجودین کومی و ترکی پسندین تنظیمان دیما ببر انت چیا کہ مچی و تپاکی بلوچانے حق و حقوکانے گرکے کشکا تچکتر و نزیکتر کنت۔

مندوست کہ چہ ھما پیسرا دیوانے گپان شری ے سرا دلگوش دارگ ات یگناگہ جزباتا اتک و گوشتی کہ: جی ھو واجھان، جی منی پلین دیوانے نندوکان سد ھزار شاباش بات دیوانا۔ واجھان بلوچان آوھدان راست گوشتک کہ ملک گریبی انت بے درین رھبر، گوک جنوکین، لیڑہ مرد وارین، نصیب مبات ھچ مرد بلوچینا۔ ھنچوش انت براتان اے بلوچ کہ وتی مردم، چوک وچوریگ یلہ داتگ، اے بلوچ کہ وتی ڈیہ و ماتین وتن یلہ داتگ وڈنی ملکان یا کہ پہ کارو بار شتک یا باھوٹ انت، شپکی و دز و اشرار نہ انت۔ اے وتی حکے جارا جنت اے بلوچ وتی کومے وتواجھی ے ھاترا جد وجھد کنکا انت۔ وتواجھی بلوچانے بنیادی حق انت ۔ دیوانے اے دگہ نندوک ھوریا پسو دات جی پلین مندوست جان ھنجوش انت کہ تو گوشت اے بلوچانا کہ ما پجاہ کارین اے پکریے واھند انت۔ ھمے درگتا مندرست دیوانے کپانی میانجیا دور کت و گوشتی: براتان منی آھری گپان کوش کن ات۔ مرچی دگنیا بدل بوتک، سارتین جنگ ھلاس انت دگنیا مرچی یک قطبی انت۔ دگنیاے تھا مزنین تبدیلیے اتکگ۔ کیش چہ چاردہ ملک شوروی ے پروشگا رند اڈ بیت۔ دگنیاے اے دگہ کنڈان ھم بازین دگہ کومان وتی ازاتی و تواجھیے گپتگ یان گرگے جد و جھدا کنکاانت۔ کردان ماں عراق عملی لحاظا وت واجہ انت ۔ اوگانستان و اعراق گولایش انت کہ دمکراتیکین ملک ببنت۔ امریکاے طرح ماں عراق و اوگانستانا سوبین ببیت ما بلوچان ھن کم و بازچہ اے طرحا پائدگ رسیت مندوست ھمے گپانی تھا ات کہ دھکان چاکرجھلین پکریے تھا شت۔ مندوستے چم پہ دھکانا کپت و جستی کت دھکان ترا چی بوت؟ دھکان چاکرا پسو دات کہ من تئے گپان تاں اھرا اشکت و اھدیگین ھیالے کپتان، آزمانگان بازین بلوچے گون ڈنی ملکانے واکان مڑتگ انت بلے ڈنی واکان و آھانے غلام و چاپلوسان چوشین سرمچارانا دز، اشرار، ڈنی اجنٹ گشتگ انت۔اپسوزی گپ ادان انت کہ تان انگت گون اے نارواین تھمتان مئے بزگین و مظلومین بلوچ کشگ بیگ انت۔

دھکان چاکر انگت گپا ات کہ ھاکی رنگین استیشنین گاڑیے ژوپگا دیرانے کشا اوشتات۔ پنچ نپر پہ زور و لٹ و کٹا گاڑیا سوار کنگ بوت انت۔

ھپتگے رند زاھدانے ریڈیو جار جنت کہ، پنچ نپر بلوچ کہ گون ڈنی ملکانے اجنٹان ھمکاری اش کتگ روچ نیمروچ ماں ایرانشھرے لیب جاھا پاھو دیگ بوت انت آھانی نام چوش ایلان کنگ بوت:1ـ مندوست فرزند یار محمد 2ـ ائیشرک فرزند اللہ داد2ـ چاکر فرزند گل محمد 4ـ زیروک فرزندواجداد 5ـ کریچ فرزند شیھک۔

باھیان ـ الف

2004-12-05