کمالان، بلوچستانءِ مزن نامیں کلاسیکال شاعر بیران بیت

یکشنبه 21 فروری که دنیاءِ ماتی زبانءِ روچ¬انت، استاد کمالان، اناگاهءَ ماں شپءِ پاسی نہ وش بیت و چنت وهد رند ماں چهبارءِ هسپیٹال بیران بیت. استاد کمالان نزیک هپتاد سال پیش ماں « پـرومی» که شہ چهبار 25 کیلومتر دورانت پیداگ بیت. استاد کمالانءَ وتی شاعری شہ ورنائی بنگیج کت و تا وتی زند گوں فخر و مزنین عزم برجاهے داشت.
ملا کمالان پہ بلوچءِ راج و بلوچ دود و ربیدگ یک مزنین گنجےات که مان بلوچستانءِ تاریخ و بلوچءِ راج نمیران انت.

استاد کمالانءِ هنر و آییءِ بلوچی شئیرانے یاد، و هنچوش آییءِ بی مٹ و مثالیں شئیر و طرز، و آییءِ برزیں توار بلوچستانءِ هر کُنڈ و جاه شنگ و تالان¬انت. استاد کمالانءَ گوں حب په وتی راجی شناخت و وتی شهدیں زبان، بلوچی دود و تاریخ، و هنچوش بلوچی جذبه و احساس ماں راجءِ دلءَ چوش که نوری زندگ داشتگ. هر وهد ماں سور آروسان، ای استاد کمالانءِ برزیں آواز بیتگ که بلوچاں وتی آروس و شاده، برجاه داشتگنت و وتی دود و رسم زندگ کتگنت. استاد کمالانءِ هنر و مهارت گوں موسیقی، دنیاءِ هنری اکادمیاں هم مَـنِـتگ و دو سال پیش مان تهران آییءَ هنری نشان و مدال رسِتگ.

مروچی بلوچ راج، المءَ شہ استاد کمالانءِ هنر زبهرانت، بلے آییءِ حب و جهد را پہ بلوچی شئیر و شاعری، پہ بلوچی تاریخءِ گوشگ و زندگ دارگ گوں وتی وش و برزیں توار، ماں بلوچستانءِ تاریخ ماریت و آییءِ یاتءَ هر وهد زندگ داریت.

بلوچستانءِ راجی زرمبش شہ استاد کمالانءِ بیرانی باز بژنی انت و آییءِ هنر و خدمتءَ را پہ بلوچءِ راج و بلوچی دود و ربیدگ، و پہ بلوچی شناخت و هویتءِ زندگ دارگ، ماریت و باز باز ستائینیت. امیدانت که بلوچستانءِ آ دگہ هنرمند و شاعر وتی عزمءَ هنچوش که استاد کمالان، برز و قائم بدارنت تا بلوچءِ راجی شناخت ماں ای سخت و سیاهیـں دور زندگ دارگ ببیت و هر بلوچ پہ وتی زبان و راجی شناخت فخر بکنت. بلوچستانءِ راجی زرمبش، استاد کمالانءَ نمیران زانت.

بلوچستانءِ راجی زرمبش وتءَ را گوں استاد کمالانءِ لوگءِ مهلوک و سیادان همدرد زانت و آیانی غماں شریک انت. بلوچستانءِ راجی زرمبش، استاد کمالانءِ بیرانیءَ یک مزنین تاوانی پہ بلوچ راج زانت و وتی دلپدردیءَ گوں بلوچ راج پیش کنت.

سبز بات بلوچی دود و ربیگ

بلوچستانءِ راجی زرمبش
21 Feb. 2010