حبیب جالب بلوچءَ شھید کنگءِ دشمنی کارکردا بلوچستانءِ راجی زرمبش ایر جنت۔

حبیب جالب بلوچءَ شھید کنگءِ دشمنی کارکردا بلوچستانءِ راجی زرمبش ایر جنت۔ حبیب جالب بلوچ یکے شہ تجربہ کارتریں بلوچ سیاستکار و بلوچستان نشنل پارٹی –مینگلءِ کارگشاد ات کہ 14 جولائی 2010ءَ ماں شالکوٹ دژمنانی تیراں شھید کت۔ گوستگیں 16 ماھانی توکا شہ بی اس اوءِ پیسری سروکاں حبیب جالب سئمی کس ات کہ شھید کنگ بیت۔ چدا پیسر مولابخش دشتی 11 جولائی 2010ءَ و غلام محمد بلوچ 3 اپریل 2009ءَ شھید کنگ بیتگ انت۔

بلوچستانءِ سیاستءِ توکا بلوچ وانندہ گل –بی اس اوءِ کرد شہ جوڑ بیگءِ سال 1967ءَ دیم پہ انگو لایق ستا بیتگ۔ بلوچ وانوکاں وانگ و زانگءِ پڑا کمک کنگا بگر تانکہ سیاسی تربیت و راجءِ پانکجنی؛ پھکیں پڑاں بی اس او پہ راجءَ یک سانڈیں کوپگے بیتگ۔ ھمے وانندہ گلءِ درآرتگیں وانندواں پاکستانءِ پلپانچیں چاگردءَ وتی راجءِ سیت جاھے گوں شیواری و جاھے گوں گھرتی پھازتگ انت، و وتی دامن شہ پولنگیءَ رکـّینتگ انت۔ ھمے بی اس اوءِ درآرتگیں سیاسی سسا ساچانی لایقیں سیاستءَ پاکستانءِ سرکار بے واب کتگ، پمیشا آ دگہ پڑاں بے واک بیگا پد نیں گچینی سراں سرسندگا انت۔ ھمے لایقیں سرانی نیاما حبیب جالب بلوچ یکـّے ات۔


حبیب جالب بلوچءَ وتی شاگردیءِ دئورا شہ بگر تانکہ زندہءِ گڈی سالاں جیلءِ سانکل، کوہءِ شتکیں تلار، درانڈیھیءِ تھلیں تام و گوں دشمناں ھمدیوانیءِ کچّل پہ بلوچ راجءِ شرّیں بانداتےءِ شوھازا دیستگ، چکـّاستگ و نوشتگ انت۔ اگر ھمے ردا آئیا رسگا ثمر نہ رستگ، آ دلپروش نہ بیتگ و وتی ارادواں مهکم اوشتاتگ۔

دشمنءِ واھگ گوں حبیب جالب بلوچ و آئیءِ وڑیں آدگہ گچینی بلوچ سسا ساچانی کشگا ھمیش انت کہ بلوچ سیاستءَ شہ تچکیں راھا بے راہ بہ کنت۔ و دنیاءِ دیما بلوچ راجءَ یک گمراھیں راجے ظاھر بہ کنت۔ البت دشمناں زانگ لوٹیت کہ بلوچ سیاستءَ وتی مادن گپتگ و شہ پیسری وھداں انگت وشتریں وڑےءَ پیشگنزان انت۔ پمیشا بے راہ کنگ ئی شہ دشمنءِ واکا در انت۔ المـّا بلوچ راج وتی راجی آجوئیءَ گریت و بے سوبی دشمنانی بھتا کپیت۔

بلوچستانءِ راجی زرمبش
16 جولائی 2010