بلوچستانءِ راجی زرمبش مولابخش دشتیءَ شهید کنگءِ کارکردءَ محکوم کنت

مشرقی بلوچستانءَ بلوچ سیاسی راھشون مولابخش دشتی کہ نشنل پارٹیءِ بنجاھی کمیٹیءِ باسک ات و بلوچ وانندہ گلءِ پیسری سروکاں شہ یکـّے بوتگ دوشبنہءِ روچءَ تربت شهرءِ نزیکا شھید کنگ بوت۔ بلوچستانءِ راجی زرمبش اے سیاسی کوشءَ محکوم کنت و ایشیا پہ بلوچستانءِ راجی سیاستءَ یک گرانبھائیں تاوانے لیکیت۔

بلوچستانءِ راجی سیاستءِ ردوم پاکستان و ایرانءِ انساندشمنیں واکداراں ترسینگا انت۔ آ مارگا انت کہ جاور پہ آواں نگيگتر بیگا انت و بلوچ راج وتی منزلءِ نزیکترا رسگا انت۔ بلوچ سیاستءِ اے کامیابیءِ پروش دیگا وڑ وڑیں راھبند ایران و پاکستانءَ کارمز کتگ انت۔ آ دگہ پڑاں بے سوب بیگا پد نیں پہ ھما سیاسی جھدکارانی کشگا چست بیتگ انت کہ ایمنیں جھد اش رندگیری کتگ۔

مولابخش دشتیءِ زوال بیگءِ درگتا بلوچستانءِ راجی زرمبش آئی کٹم، گل و راجءِ دیما دلپدردی درشان کنت۔ مئے باور ھمیش انت کہ مولابخش دشتی و دگہ ھزاراں شھیدانی داتگیں قربانی ثمر دی انت۔ عاقبتءَ دشمن پروش ور انت و بلوچ راج وتی راجی آزادیءَ دستگریت۔

اے پڑا ضروری انت کہ سیاسی و سلاحبندیں بلوچ جھدکار کسانیں مخالفتاں یک گوئر بہ کن انت و یکـّا دگرءِ نیمگا تپاکیءِ دستا شھار انت۔ ایوکا بلوچ راجءِ تپاکی دشمنانی پندلاں پروش دات کنت و منزلا نزیک رسینیت۔

بلوچستانء راجی زرمبش
14 جولائ 2010