بلوچی مئے وتی شھدیں زبان انت
گلیں وانوکاں ، اے نبشتانک پھ سبی میلھ ءِ دیوانءَ کھ مئے نروژ(ناروے) ءِ بلوچاں سال 1993ءِ ماں اسلوءَ برجم کتگ ات، نبیسگ و دیم دیگ بیتگ ات۔ امیت انت کھ انوں ھم شما را پسند بیت ۔ ( اسماعیل)
کچّی نھ پرّام ۓ منءَ !
اسماعیل امیری
11/03/1993
پانزدھمی سدیءِ گڈ سرا ، بلوچانی دو مزنیں ٹکّ بزاں "رند" و "لاشار" چھ بولان و مولاءِ گٹّاں گوزان ، رند ماں سیبی(سیوی) و لاشار کچّی (کچّھی)ءِ دمگاں آتک و ھنکین اش کت ۔ چھ آییءَ پیش ، اے دوئیں ٹک ، میر چاکرءِ پت سردار شیھکءِ سروکیءَ ، ھور و تپاکیں چاگردےءَ زند گوازینگءَاتنت۔
میر چاکرءِ سرداریءِ دورءَ ، سیبی بلوچانی بنجاہ بیت ۔ آ دورءِ قبایلی زندءَ ، اسپ و گرھتاچیءَ مزنیں اھمیّتے ھست ات ؛ پمیشا سیبیءَ مدام اسپانی گرھتاچی بیت ات ۔ بیت کنت کھ مروچیگیں دورءِ سیبیءِ جشن( سبّی میلھ) ، ھما دورءِ یادگارانت ۔
میر چاکرءِ دورءَ ، ماں سیبیءَ اسپانی گرھتاچیءِ احوال ، چھ آ زمانگءِ شعراں ھم دست کپنت و ھمے دابا چھ آ دورءَ رند ، " ملا شوران" ءِ نامداریں – گوھرءِ ھرّانی – شعر ھم ، ھما گرھتاچیءِ نامءَ گریت کھ "رند " و "لاشار"ءِ جنگانی بنگیجءِ نیمون بیت ۔ چوش بیت کھ یک رندے ماں اسپانی گرھتاچیءَ ، میر چاکرءِ بچ" ریھان " و میر گوھرامءِ بچ "رامین" ھم ماں گرھتاچیءَ ھوراتنت ، و گشنت کھ آ دوئینانی اسپ ھوریءَ ھالءَ سر بینت؛ بلے چو کھ فیصلھ کنوک رند اتنت، پمیشا میر چاکرءِ بچّ ریھان ، گرھبر بزاں سوبین جار جنگ بیت و چھ اشیءَ ، رامین گوں وتی ھمراھاں پھ نھ وشّی چھ سیبی ءَ در بیت و کچیءَ واترّ بیگءِ راہءَ "گوھر"ءِ – کھ میر چاکرءِ میارات – اشترانی ھرّاں ڈلیت ۔
پیری آتکگ انت لاشاری
اسپیت چادر و بور شالی
( پھ ) شرط و شادہ و بورتاچی
۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
ھلک اش پیڑاتگ گوربامی
چانگو آتکگ انت کستی ءَ
بر گشت انت پدا مستی ءَ
ڈیک اش داتگ ات مچّی ءَ
میش و گورم و ڈاچی ءَ
ھرّاش گپتگ انت جتکی ءَ
کارچاں کشتگ انت تیزیناں
( ملا شوران)
اے کارءَ ، رند و لاشارءِ ھما کھنیں نھ وشّی و دلرنجیءِ پرانی چیرءِ اشکرانءَ ھپ و آسءَ را جمبلاس کت کھ آ ابید چھ لاشاریانی ھمشوریءَ ، میر چاکرءِ سرداریءِ جارءِ جنگءَ ودی بیتگ ات و آییءِ آسرءَ لاشاریاں ، میر گوھرامءِ سرءَ سرداریءِ پاگ بست و رند ترءَ ، کچی و گنداوگ ءِ سر سبزتریں زمین و دمگانی خاطرءَ کھ لاشاریانی دستءَاتنت، اے نھ وشّی و کینگ گیشتر بیتگ ات۔
ملا شوران چھ سردار گوھرامءِ قولءَ گشیت :
" کچی ءَ سرا سر ُبرتھ نی ھرّانی میار ءَ زُرتھ "
سیبی ءِ کوچگ گوں بولانءِ گٹ ءَ نزّیک و چھ بلوچستانءِ گرمتریں دمگان انت۔ چھ کھنیں زمانگاں ، سیبیءِ نزیکیں سارتیں دمگانی مالدار ، زمستانءَ گوں وتی دلوت و رمگاں ، سیبیءِ کوچگءَ آتک اتنت و گوں زمستانءِ ھلاس بیگءَ پدا لڈات و وتی دمگاں شت اتنت ۔ ھمے واتر بیگءِ وھد ، ھم پر آھاں و ھم پر ھَندی مردماں گر و دۓءِ شرتریں وھدات؛ اے پیما پھ دلوتانی زیرگ و بھا کنگ و سوداگریءَ ، میڑہ و مچیانی برجم بیگ بنگیج بیت ۔
گشنت کھ بید چھ اے میڑہ و اسپانی گرھتاچیءَ ،ماں سیبیءَ ، میر چاکرءِ سروکیءَ بلوچ سردارانی جرگھ و دیوان ھم بیتگ انت کھ ماں اے دیواناں وڑوڑیں اڑ و جنجالانی باروءَ سھل و تران بیتگ ۔ وھدیکھ انگریزاں ، بلوچستان گپت گڑا سیبیءِ جشن ھم پھ وتی سیتءَ کارمرز کت اش ۔ ھر سال جشنءِ وھد ءَ ، شاھی دیوان و جرگھ بیت و انگریزانی ایردستیں سردار و قبایلی سروک و حکومتی کارندھاں ، داد و لقب دیگ بیت انت۔
سال 1882ءِ فروریءِ ماہءَ ، انگریزانی نمایندگ " سر رابرت سنڈیمن " ءَ چو شاھی دربارانی وڑا مزنیں دیوانے لوٹائینت کھ ماں اے دیوانءَ ، بلوچستانءِ بازیں قبایلی سروک آتکگ اتنت و آییءَ وتی گشتانکءِ تھا ، پیشنھاد کت کھ ماں سیبیءَ ھر سال "اسپانی میلھ" ببیت کھ چر اشیءَ سردار و قبایلی سروکاں وت ماں وتءَ دیوان و گپ و ترانءِ موہ رسیت و ھمے دابا پھ اسپانی ردوم و سوداگریءَ ھم دیمروی بیت انت ۔ چھ آییءَ پد ، نوں ھر سال فروریءِ ماہءَ ، ماں سیبیءَ اے جشن و میڑہ برجاہ دارگ بیگءَانت ۔ ٭
ماں اے دراں ڈیھیءَ ، اگاں ما و شما وتی راج و سرزمینءِ چشیں کھنیں دوداں جشن بگریں و برجاہ بداریں ، چھ اشیءَ شرتریں کار دگھ چے بیت کنت ؛ چیا کھ یک نیمگے پھ اے ملکانی راج و مردماں ، مئے دود و ربیدگءِ پجّاروکیءِ وسیلھ بینت و اے دگھ نیمگا ، ھماھانی سیادی و نزیکیءَ کھ ماں دراں ڈیھیءَ دلاش پھ وتی راج و گلزمینءَ سُچیت و پر آییءِ کٹ و ھمبازءَ ھدوناک انت ، گیشتر و مُھر تر کنت ۔ ھمے دابا پھ مئے ھما نوک رودیں زھگانی کھ ماتیں وطناش نھ دیستگ یا ھما عمرءَ دراںڈیھ بیتگ انت کھ آھانی کودکیں ذھنءَ ، آ رنگ و دروشم شموشتگ انت ، گوں وتی راج و ملکءَ ، سیادیءِ رشتگءِ برجاہ دارگءِ وسیلھ و مِھر و دوستیءِ برجاھیءِ سبب انت ۔
گشنت کھ سردار گوھرام لاشاریءَ قول کتگ ات کھ وتی ملک و سرزمینءَ ھچبر یلھ ندنت و چو گشتگ اتی :
" گوھرامءَ را بی دو جاگھ گور بیت یا مجیں گنداوہ "
بلے وت ماں وتی سی سالانی جنگ و کشت و کوشءَ ، آییءَ ، کچی و گنداوگ پھ ناکامیں دلےءَ یلھ داتنت و سندءَ شت و جاہ منند بیت ۔
چو میر گوھرامءِ وڑا ، ما و شما ھم کھ وتی ملک و ڈیھ پھ ناچاری و ناکامیں دلےءَ یلھ داتگ ، اگاں دگھ مزنیں کارے کت نھ کنیں بلے کم چھ کم چو سردار گوھرامءِ بچ " میر بکّر خان"ءِ وڑا وتی ماتیں وطنءَ یاد بکنیں کھ آییءَ کچی چوش گیر آرتگ و زھیر نالتگ ات :
کچّی نھ پرّام ۓ منءَ سھر کن ۓ تو ھوشگاں
سوری دہ گنجیں مٹھڑ ءَ درستاں منی سوزءِ جو انت
کچّی نھ پرّام ۓ من ءَ !!!
کچّی نھ پرّام ۓ من ءَ !!!
سوری ، مٹھڑ( مٹھڑی) = کچیءَ جاگھانی نام انت ۔
سوز = اسپ ءِ نام انت ۔
٭بچار ، ماھتاک " بلوچی لبزانک " ، جنوری 1993 ، دیم : 89-90