ترانے گون بلوچ راج دوستان!

په هلوا هلوا کنگ دپ شیرکن نبیت!

نوهان- سربازی

کے انت کہ آ بلوچ کوم و بلوچستانے پد منتگی، بے وسی و اڑ و جنجالانا ء هالا سرپد نہ انت؟اگن بلوچ کوم وار انت اگن بلوچستان مان ایرانے تها پدمنتگترین ملک زانگ و منگ بوگا انت. واگن هنچوش آیےحق و حقوق ورگ بوتگ، بزان آیی سراچنت برابر زلم و زورانسری بوہگا انت . کومی زلم،گزرانی زلم، دود ء ربیدگی زلم، هر وڑین زلمے کہ مان اے دگہ دگنیاے دیکتاتورین ملکان هست بلوچ کومے سرا بوِئگا انت.

گرا ما را شریے سرا گون هما ستلیتے دورگند کہ ڈنی دانشور و زانتکاران چہ آزمانے سرا، زمینے کنڈ کنڈا ،میتگ پہ میتگ ، کلگ پہ کلگا و لوگ پہ لوگا گند انت بچارین کہ اے زلم کنوک کے انت؟ چہ پیما اے زلم و زورانسریانی دیم اشتگ یا کہ دارگ ببیت؟

واجهان و براتان، کار پہ هبرا شر نہ بنت عمل هن لوٹیت. کے انت کہ عمل کنت؟ یکے، دو، سه یان کہ سجین بلوچ دانشور، زانتکار و کواس؟.

واجه، برات،گوهار،سنگت ، همبل، شیر مزارانی پسگ و دهتگ!

چمانا شریے سرا پچ و مجگا په جوانی کار بند.دگنیا مان بیست و یکمی کرنے تها انت دگنیا گون علم و تکنیکا په تیزیا دیما روگا انت. بلے اپسوز و هزار ارمان کہ تئے کوم ژند و ژول انت. تنے کوم سند و سیل انت. و تے کوم سیاسی وگزرانی ، دودو ربیدگی هالتا هنچوش گانڈ انت کہ سر و بنی هچ زانگ نبیت. هر کسا بچارے چوش که بے مهارین هشترے یان که اپسیا اے دیم و آ دیما تچگا انت.

کسا بچارے راج راج ، وتن وتن ، من من، تو تو، آزاتی، گپا وت واجهی و آجویء هر جنت.

تا جای کہ من زانان بلوچ کومے نزوری و بدهالی و بلوچستانی پسماندگی و بدبحتیء زمہ وار بازانت من دو نمونگ شمے هزمتا پیش کنان۔

1- یکے بلوچ و بلوچستانے ڈنی دژمن انت. اے هن چنت بهر انت.

2- دومی بلوچے وتے جندے توکی دژمن انت اے هن پدا چنت بهر انت

آ که ڈ نی دژمن انت زانگ بنت که کےانت. چوش کہ ایرانے گوستگین و هنوگین واکان. بلے اے گپ کسیے زانتا نییت کومے توکی دژمن کہ وتا بلوچ کومے دوزواه زانت آ هر وهد و مداما همے جهد و کوشستا انت کہ بلوچ کومے رهدربر ودوزواه و هِیر لوٹوک زانگ ببیت.

بلے وهدے که اتحاد، مچی، هورکاریے گپ کیت دپا ادان و اودان جنت.چیا کہ ا نلوٹیت بلوچ مان وتی جهدا کامیاب و پہ وتی دیریگین مکسد و مرادا برس ایت. ا چیروکایی گون اے دپے ادان و اودان جنگ چہ بلوٹیت یا کہ ملوٹیت بلوچ کومے آهونڈان چہ بونا برگ انت و گون بلوچ دژمنا هور انت آ چاپلوس انت. بلوچان آ وهدان راست گوشتک که: ملک گریبی انت بے درین رھبر، گوک جنوکین، لیڑہ مرد وارین، نصیب مبات ھچ مرد بلوچینا.

واجه، برات،گوهار،سنگت ، همبل، شیر مزارانی پسگ و دهتگ!

ا یانۓ که په وتی زند و پہ وتی زات و جوریاتا پہ وتی پاگواجهی و غلامی و چاپلوسیے واستا گون بلوچ دژمنا بلوچ کومےهلاپ انت گرا چشینانی نام تہ راج دپترا تا ابد په بدی و روساهی مان ایت.

اگن کسی اشی هلاپا وتی چار روچی زندا پہ دل و ستک په کوم و ملکے هاترا پہ گریب و بزگین کومے حق و حقوقانی گرگے واستا جان و مالا وتی کربان کنت گڑا لازمی انت کہ چشینانی نام و توار چوش کہ دادشاه واے دگہ شهیدانے کہ مان بلوچستانا گوستگین هکومت و هنوگین ایرانی اسلامی رجیمی پلیتین تیرانی اماج بوتگ انت، پہ بزگین و بیوسین کومے دلے تها چوش کہ درپشناکین استاریا تہ راج دپترا تا ابد مان ایت و هنچوش بلوچ کومے نوکین نسل و اوبادگ آییا شاباش کنت شاباش.

یکے دگہ چہ بلوچستانے بزگی و واریے سببان اش انت کہ چنت هنچین بلاهین هژدیها ے دپ مان آیے بڈا سک انت کہ بلوچا پہ نپسے کشگا هن نییلنت.

واجهان و بیبیان!

وهدے کہ هژدیا یک بلوچیا دپ جنت چیتک و چیهالےجنگ تهنا بلوچ نہ هر انسانیے اولی کار انت. آ باید انت کہ کوکار بکنت تان کہ دگہ کر و گوری مردم سهیگ ببنت کہ اے واجها یا اے بلوچ کوما، هژدیا دپ جنگا انت یا کہ آیا ویلے گپتگ.

بلے اپسوز و سد هزار ارمان کہ اے خبیسین هژدیایا هنچین دمے یا تلزمے یاد انت کہ چیتک و کوکارا هن نیلیت.

چیتک جنوکے دپا هنچوش بند کنت کہ دگہ برے آ هچبر نژگے جت مکنت اےتلزم کلاشینکف انت ای تلزم شهاب 1،2،3 و... انت ای تلزم اتم بمب انت اے تلزم پاهو انت اے تلزم بندیگ جاه انت اے تلزم اعتیاد انت اے تلزم وت مان وت میڑینگ انت اے تلزم بلوچ کوما چه علم و زانتا پرینگ انت ، اے تلزم ٹگی و پلینڈی انت.

ایران و پاکستانے حکومتان و آهانی زالمین فوج و هون وارین سپاه و کمیتهے اولی کوشست همے بوتگ کہ بلوچ کومےگار کنگ و آیے ملکا نیست و نابود کنگے واستا آیی کومی شعور و زانت ، زبان، دودوربیدگی پکر و هیالا، گار بکنت تان همی گپا بیهال بکنت کہ آ وت یک کومے انت و یک وهد و زمانگے آ وت یک ملکے واهند بوتگ.

واجهین برات و بانوکین گوهاران!

پہ هلوا هلوا کنگ دپ شیرکن نبیت. اگن واکی کسے لوٹیت کہ گون هلو دپا شیرکن بکنت ا یے پدگیریا بکنت . گڑا آیرا لازمی انت کہ گرو لانچ و تچ تاچ بکنت جد و جهد بکنت. هما چیزانی پدا بجنت کہ هلوا چہ آهان اڈ کنگ یا که حوڑ کنگ بیت.

واجہ، برات،گوهار،سنگت ، همبل، شیر مزارانی پسگ و دهتگ!

منی هیالا بلوچ کومے هلوا تپاکی انت. مچی انت. یک و دگرے برداشت کنگ انت.هور کاریے هیلکنگ انت. آ کومےوژهالی انت. ملکے وت واجهی انت. آ ملکے آجویی انت.

واجہ، برات،گوهار،سنگت ، همبل، شیر مزارانی پسگ و دهتگ!

بلوچ کومے یک کمین بهرے چہ اڑ و جنجالان پہ اے کمین زانتا، شمی هزمتا گوشگ بوت انت.و منی هیالا اے گوستگین 26 سالے جد و جهد مزنین تجربہ ے پہ ما بلوچستانے سیاسی ، دانشور ، کواس و تنظیم و پارتیان.

واجهان، بیبیان، براتان و گوهاران!

ایشانی گارو ویلگوج کنگے ایوکین راه ومادن تپاکی انت .مچی انت. هورکاری انت.مے و شمیگ راه پهک یکے آ راه و مادن بلوچستان و بلوچ کومے وشهالی، آجویی ، وت واجهی و ایے توار مان ڈ نی ملکان رسینگ انت. مچی و تپاکی ، یک و دگرے برداشت کنگ انت.هور کار کنگےهیل انت.آ کومے وژهالی انت. ملکے وت واجهی انت. اے ملکے آجویی انت. اے پهک بلوچانے حق و حقوکانے گرکے کشکا تچکتر و نزیکتر کنت۔ اے مے و شمےاولیگین هدف و مراد بیبیت۔

نون دیما کنزگے وهد انت۔ دست دراج کنگے وهد انت. مهر و محبتے وهد انت. نون عملے وهد انت. کے انت کہ عمل کنت؟منی پسو ، سجین بلوچ دانشور، زانتکار و کواس.بیا دیما کنز . اے تے ماتین وتنے کلو انت اے تے پل و گلابین ڈیهے کلو انت کہ گوشیت:

او بچ منی دهتگ منی

وپتگ ء وابے تا کدی

بزگ و وارے تاں کدی

بی سد ء سارے تاں کدی

چمدارے گجرانی تاں کدی

کپتگ زرمبشت ے همبلی

مانچتگ دگنیاء او دلبری

ملک اش کتگ انت آزات وتی

پیرء ورنا هورانت سرجمی

او بچ منی دهتگ منی

وپتگ و وابے تاں کدی

نشتگ و چارے تاں کدی

بست کن چه وابا یک بری

تو چکے میرین گهرام و چاکری

کول و عهدے بکن او بچ منی

موک وتی وتن پیروکی

وت واجه کن لگتمالین راجا وتی

جوڑین ات تپاکی ے په همدلی

که واهگ انت بلوچانی بندری

یک جاه کن کل بلوچا یک بری

ملا، پکیر ودهکان مچ سری

شپانک ، تاجرو تیاب گوری

کاری، صنعتگرو زرگری

جنین ، مردین و راجدربری

اوبچ منی دهتگ منی

وپتگ و وابے تاں کدی

بزگ و وارے تاں کدی

بی سد و سارے تاں کدی

مانچتگ زرمبشتی دگنیاء یک بری

ملک اش کتگ انت وتواجه وتی

تو انگت نشتگ و چارے په بے وسی

کول و عهدے بکن دلجمی

گون همدل و یلان همرهی

آجو بکن وتن مات و پتی

گپتگین میرین گوهرام چاکری

چه شالکوت و کلات ء نصیری

پیشن، گوادر و کلمت حملی

هاران، کیچ و مند ملا فاضلی

سبی و ڈاڈرمیرین چاکری

زاهدان،واش و نیمروز برزسری

دمن ، بمپور و پهره مرکزی

پنجگور، سراوان و بمپشت کوهسری

آشار، کزور و نسکنت آپسری

سرباز و گه و کسرکند نیبگی

راسک، پیشن و باهو رهسری

چهبار و کنرک و جاسک تیاب گوری

بنت و دهان و لاشار قنبری

تان بشکرد و رودبار و کهنوچء قبلهی

تیئ وتی میراث انت او بچ منی

بل اے عادت و هیلان بی بنی

ناتپاکی و برات کشی و ناشری

چوگولی، پلینڈی و مکارسری

گجر و ملاهانی رهدربری

دروگ، بٹاک و هیرگ بے بنی

او بچ منی دهتگ منی

بزگ و وارے تاں کدی

جوڑین ات تپاکی ے په همدلی

کوهی و شهری و تیاب گوری

سیاه و اسپت و سهرسری

آس بدے پتن ھڈی و جاهلی

پهک هون و گوشت انت شاهیم سری

اے پهک تیگ انت او دلبری

انگت نشتگے او بچ منی دتگ منی

بست کن چه وابا په وشدلی

هوار کن براتان یک ردی

توار جن حقان راجی وتی

ماتے نیکین دوا پشت انتترا او بچ منی دتگ منی

اے ماتے سوج و پندانت آهری

شات و سوبین باتے یک ردی

او بچ منی دهتگ منی