جنینانے جهانی روچ بزان 8 مارچ مبارک بات

جنینانے جهد و آیانی هکانی پدمال کنگ(لگت مال کنگ) چه بندرا مان دگنیاے بازین کنڈان جاهے په دودوربیدگی جاهے په دین ونیک راهیے بوتگ و انگت هم وڑ وڑین ڈولا وتا مان مئے چپ و چاگردا پیش دارگا انت.

بلے مان لهتے هنوگین اسلامی ملکان چوش که ایران جنین ادم دومی نمبر نه بلکین دهمی نمبر زانگ بوگا انت که په اشانی پکر ے مطابکا جنین یک کم زانت و بے اراده و پولینگ چنوکین انسانے که درستین کرد په آییا عیب و په مردینا وشنامی زانت۔ و اے دابا مان بیست و یکمی کرنا مان ایرانا په مذهبے ناما گچین بویگے هک پدمال بیت و جنین چے وتی بازین کار وچلوپگان ، وانگا و وتی تبے پچ و پوشاکا زبهر کنگ بوتگ.کم نهنت کسانے که په حجابے سوبا په اشانی دیما اسید یا که دگه وڑین درمان ریچگ بوتگ.و هنچوش په ملاهانی شیپاگانی ورگ و سنگسار کنگ و یا که په اسلامے بے ابرو کنگا؟؟؟!!! میاریگ و محکوم کنگ بوتگ انت.

تان ادان گپ په اسلامی رجیم و واکانی باروا ات، بلیے مان بازین راج ومردمانی توکا چه مذهب ودود و ربیدگے سیاستا هورجانگ مانشولینگا هن کمتر بزگی په انسانا و هاس کار په جنینانا یارتگ .

په بژن و دلپدردی مان بلوچ راجا هم چه اے رما( گلگا) په درنانت.

په درور(مسال) من روچ دراتکی بلوچستانے لهتے تک وپهناتان گوشان بلوچستانے بازین جاهان بلوچ جنین چه وانگ جاهانی نبیگا و یا که پت و براتانی نمنگے سوبا ناواننده وتی لوگ واجه و پت و براتانی چمدار انت.

مان پاکستانا حاص کار مان سندا بے کسین جنینانا په زور وکوران و پیر وزیارتا آروس کننت و اشانا سانگ دینت

مان پاکستان، هندوستان،سریلنکا و بنگلادشا گشتر مان پنجاپی زبانے گپ کنوکین مردمان جنین چوک یک شومین انسانے زانگ بیت که هچ کس نلوٹیت که شومے مان ایانی لوگا پیداگ ببیت. حاص کار مان هندو مذهبا.مان هندوستانا حاص کشمیرا په زمین و مالے پجازگا یک جنینیا گون چار یا که پنچ براتا سانگ دینت.مان سومالی و بازین عربی ملکان بازین دگه زجراورین کوشندین دود هست انت که اے درست په جنین ادمانی زندیےهمراه انت و سرپ په جنین بوِئگے سوبا میاریگ انت که اے دراهین کولینجان په وتی جنینا بکشیت.

بژن که اے دراهین کرد مان وهدے بیگ انت کے جهان مان بیست و یکمی کرنے تها انت.

په بلوچستان ء راجی زرمبشے زانتا چے اے جاورانے درایگے ایوکین مادن مان جنینانی وتی دستا انت که وت اے جهالت وتهارماسگین دود و ربیدگی پردگا بچیک انت و وت وتی رهشون ببنت.چیا که یک زانکارے گوشتن انت: تو منا سرپد و زانتکارین ماتے بدے ، من ترا یک سرپد و زانتکارین راجے دیان. اے شیے معنا اش انت کے سرپد و زانتکارین جنین یک راجے سرپد و زانتکار کنت. چوکے کے چه ماتا پیداگ بیت آ جهانے اولی ندارگا چے ماتے کٹا گندیت.

هنچوش اے هبر جهانی صورتا منگ بوتگ که هما راج دیما شت کنت که اودان جنین و مردین دوئین هوریا جهد بکن انت

اگن ما کمی نزیکترا بچارین دگنیاے اے دگے دیماشتگین ملکان چش کے یوروپ و لهتے چے آسیای ملکان جنین زندے همک تک و پهناتان گون مردینا همکوپگ و همسنگر بوتگ.

بلوچستان ء راجی زرمبش دلجم انت که روچے بلوچ راجے روشن هیالین وانندگ و زانتکاروتی راجے نزانتی و تهار پکریا په جنینانے باروا ویلگوج کن انت وگون جهانے دیماشتگین راجانی همکوپگی و همراهیا په گهترین روچ و گهترین دگنیاے وپه جوانین زندئے ء گام زورانت.

بلوچستان ء راجی زرمبش

2008-03-08