شیعہ آخوندءِ ناھودگیں تران

ھنچو کہ ما پیسرا گشتگ، ایرانءِ اسلامی جمھوریءِ رژیمءِ نام تیوکا اسلامی انت و اے حکومت و واکداراں گوں اسلامءَ ھچّ دوستی و بندوکی یے نیست ، آھانی درستیں کارکرد و کوشش مدام ھمے بیتگ کہ وتی کٹریں بزاں بنیاد پرستیں شیعہ سیستم و نظامءَ نہ تیوکا ایرانءَ بلکیں جھانِ اسلامءَ حاکم بکنت و ھمے راہءَ اے حکومت ، ایرانءِ بودجہ بزاں بجٹءَ مزنیں بھرے وتی دابیں ملکی و درملکی پلینڈ و بنیادپرستیں ھوربند و حزب و شیعہ ملایانی سرا خرچ کنگءَ انت ۔

ھنچیں شیعہ ملا باز انت کہ بلوچ و سنّیانی سرا دنتان درشنت و آھانی خلافا زھر شانی کننت و ایرانءِ حکومت آھاں داد دنت و ساٹیت ۔ چہ ھنچیں ملایاں مھدی دانشمند نامیں آخوندےءَ ھمے چیزے وھد پیسرا بلوچ و سنیانی خلافا ھما دابا کہ آییءِ دلءَ لوٹتگ زھرشانی کتگ و ناھودگیں بُھتام بلوچ و سنیانی سرا جتگ انت ۔

اے آخوندءِ گپانی ویدیوءِ بھرے دیدہ بانءِ حقوق بشر بلوچستان ءِ جھدکارےءَ پہ رادیو بلوچیءَ راہ داتگ ۔ بیا ات کہ چاریں اے وتگڑیں شیعہ آخوند چون و پرچیا بلوچ و سنیانی چُک چین کنگ و بے گواھیءِ جھدءَ انت۔

اے کٹریں شیعہ ملا وتی گپاں گوں تنظیم خانوادہ بزاں کم چُک آرگءَ شروع و حکومتءِ پالیسیاں ایرجنت بلے درستیں میار و گناہءَ سنیانی سرا لڈیت ، آ گشیت:

"چہ فرزند کمتر زندگی بھترءِ وڑیں گپاں ، ھَنی ما گوں مسئلہ و مشکلےءَ دیم پہ دیمیں ماں ایرانءَ ھما سنی جاھمنندیں سیمسری بزاں مرزی دمگاں کہ چہ پاکستان و سعودی عربءَ داد و انعام و زرّ رسیت اش کہ جن بگر انت و جاڑ جاڑءَ چک بیار انت تا کہ آھانی حساب چہ شیعھاں گیشتر ببیت  و اے دگہ نیمگا شیعہ برو انت و وتی چک آرگءِ راہءَ بند بکننت تا کہ چک میارنت ۔"

اے یک ھنچیں بے بنیادیں بُھتامے انت کہ ابید چہ آییءِ کوردل و ناسرپدیں مریداں دگہ ھچ با شعوریں مردمے اے دابیں بھتام و دروگاں باور نکننت ۔ پاکستانءِ حکومت و واکدار وت بلوچانی راجی و قومی جھدءِ پروش دیگءَ ، بلوچستانءَ فوج راہ داتگ و لشکر کشی کتگ ۔ بلوچانی وتی ملکءَ ، بلوچان ماں اقلیتءَ تبدیل کنگءِ سازش و پندلانی عملی کنگءِ کوششءَانت ۔ چہ عربستان سعودیءِ نیمگا ھم ھچ پیمیں کمک و مدتے بلوچاں دنیگا نرستگ ۔ اگاں آ راست گشیت گڑا باید بگشیت کہ چشیں زرے کدی و کئےءَ دیگ بیتگ و ثبوت پیش بکنت۔ بلے ھر کس زانت کہ اے درست پوچ و دروگیں ھبر انت ۔

دیمترا آ گشیت:

" اگاں قرار انت کہ ایرانءِ جمعیت بزاں پاپولیشن گیش مبیت گڑا ایرانءِ حکومت و واکدار باید نامردی مکننت ، مرد ببنت و اے ملکءَ بزاں ایرانءِ سنیانی دیما بدار انت ۔ اگاں راست گشنت و اگاں آھانی دل پہ اے ملکءَ سُچیت و اگاں مرد انت ، بیا انت انقلابءِ اول سرءَ سنی نندیں شھر و دمگانی جمعیتءَ اعلان بکننت و بہ گشنت کہ ھنی ماں گوستگیں سالاں چنت برابر بیتگ انت و اگاں راست گشنت ، چنت شیعہءَ وتی چُکدانءِ دپ بست و یا وتارا گوھتگ کت اش تا کہ چُک میار انت ، اے دابا وَہ نبیت کہ شیعہ وتارا بدار انت و سنی دہ چک بیاریت ۔ سنیءِ لوگءِ دروازگ کہ پچ ببیت کسان و مزن درزن درزن ڈنءَ در رچ انت ۔ آھاں بزاں سنیاں ھم باید بگشنت کہ شمئے سَیمی چکءَ سِجل ندئیں ، رای بزاں اوٹءِ حق ات ھم نیست۔"

آییءِ اے گپ راست انت کہ گوستگیں 25 و 30 سالاں ایرانءِ جمعیت چہ دوبرابرءَ انگت گیشتر بیتگ بلے اے گیشی تیوکا سنی و بلوچانی ملک و دمگاں نبیتگ بلکیں ایرانءِ درستیں جاھاں بیتگ ۔ البت اے آخوندءِ گپانی برعکس ، سنیانی و خاص بلوچءِ دیم ماں ھر پڑ و میدانءَ دارگ بیتگ۔ آ گشیت کہ سنیانی سیمی چکء سجل دیگ مبیت ۔ ھنچو ھم بلوچستانءِ بازیں کلگ و میتگاں ، بازیں بلوچانی چکاں انگت سجل نیست و اگاں آھانی مات و پت ھزار مشکل و جنجالءَ رند وتی چکءِ سجلءِ گرگءَ ، شھرءِ سجلءِ دفترءَ رَو انت ، گوں بازیں جنجالاں دیم پہ دیم بینت ۔ چہ آھاں بازیں بے ربطیں جست کنگ بیت ، اے کاگد و آ سندءَ لوٹنت و برے برے گشنت کہ آ پاکستانی یا افغان انت و یا گشگ بنت کہ مات و پتءِ سجل عکسدار نہ انت و مات و پتانی سجلانی عکسدار کنگءَ پہ ھم آ باید چہ چنت جاہءَ کاگد و تصدیق نامہ بگر انت ۔ اے دورانءَ مئے کوچگ و کلگانی ناوانندھیں بلوچ باریں چنت برءَ بے عزت بینت و ھکّل ور انت ۔ اے پیما لھتے چشیں گپّاں سگّ ات نکننت و سجلءِ گرگءَ اَنگار کننت ۔

ھمے گوستگیں ماھاں اگاں شمارا یاد ببیت ، ایرانءِ حکومتءَ بازیں بلوچے افغان بیگءِ بھانہءَ گپتگ ات و آھانی سجل ھم پچ گپتگ اتنت ۔ اے آھانی ھمے پالیسی و سیاست انت کہ ھنی چشیں آخوند ، ٹِک و درا بے شرمیءَ اعلان کنت و گشیت کہ سنیانی چک باز انت و آھاں سجل دیگ مبیت، در اصل آ لوٹنت کہ بلوچاں چہ وتی بُن پیروکی ملکءَ چُک چین و ولگوج بکننت و آھانی تلاھیں ملکءَ وتیگ بکننت ۔

دیمترا آ گشیت:

" اے دابے کہ آ دیما روگءَانت و آ تپاکی یے کہ سنیانی درمیانءَ ھست و اپسوز انت کہ اختلافے کہ شیعھانی درمیانءَ ھست تا کہ پنچ سالءَ ، پہ رئیس جمھوریءِ گچینکاریءَ رای کار انت و مجلس (بزاں نیشنل اسمبلی)ءَ رای کار انت ۔ اے پیما کہ آ وانگ و زانگءِ نیمگا روگءَانت و دلگوش دیگءَانت ، دکتر و مھندس بیگءَانت و ھنی ماں سیستان و بلوچستانءَ ، درستیں قاچاقچی سنی انت و درستیں معتاد ( بزاں نشہ کنوک) شیعہ ۔ برو ات جست بکن ات ۔"

ما نزانیں کہ آیا آییءِ مرید و آ وت ھنچو نادان و ناسرپد انت ، نزاننت کہ ایرانءِ قانون اساسی بزاں ملکءِ بُن رھبندءِ تھا نبشتہ انت کہ ایرانءِ رئیس جمھور بزاں صدر باید شیعہ ببیت ۔ سنی پہ رئیس جمھور بیگءَ اصلا کاندید بیت نکنت گڑا چون رای کاریت ۔ پہ مجلس بزاں نیشنل اسمبلیءِ گچینکاریاں ، ھما کس اوشتات بزاں کاندید بیت کنت کہ ایرانءِ حکومتءِ خلاف مبیت و آھانی ولایت فقیہءِ منّوک ببیت۔

ایرانءِ اسلامی جمھوریءِ اے کٹریں ملا وتی زھراں درشان کنانءَ گشیت:

" سنی سلاح بزیریت و بئیت و مارا بکشیت ؛ نہ ، نہ ۔ آھانی بزاں سنیانی وھابی رو انت شیعہ کشنت ، افغانستانءَ رو انت شیعہ کشنت و سران اش بُرّ انت و پاکستانءَ شیعہانی مسیتاں بمب تراکیننت و آس دینت و شیعہ کشنت ۔ بلے سنی اداں علم حاصل کننت ، قاچاقءِ کارءَ کننت ، تریاک ، ھروئین و شیشہ شنگ و تالان کنگءَانت و اے یک دگہ راھےانت کہ شیعھاں تباہ کنگءَانت ۔"

اے آخوندءِ نام شیخ مھدی دانشمند انت بلے گشیگاں چہ دانش و زانتءَ زبھر انت ۔ بہ رَوت ، چماں پچ بکنت و بچاریت کہ بلوچستانءِ دانشگاھاں بزاں زانتجاھاں چنت وانوک ھست و چہ آھاں بلوچ چنت انت ۔ ما زانیں کہ آ ھچبر راست نہ گشیت ، بلے راستیں گپ ایش انت کہ ماں مغربی بلوچستانءِ درستیں زانتجاھاں چہ زاھدانءَ بگر تا چھبارءَ بلوچ دانشجو بزاں درس وانوکانی حساب چہ دہ درصدءَ گیش نہ انت ۔ بلوچستانءَ بیسوادیءِ حساب چہ درستیں جاھاں گیشتر انت۔

یک نیمگے آ گشیت کہ گیشتریں سنی وانگءَانت ، دکتر و مھندس بیگءَانت و دگہ نیمگے توھین کنت و گشیت کہ درستیں قاچاقچی سنی انت ۔ ما نزانیں کہ آییءِ کجام دروگ باور کنگ ببیت ۔ چیا کہ اگاں گیشتریں ورنا دکتر و مھندس بیگءَانت گڑا آھاں چے ضرورت انت ، برو انت وتارا وار بکننت ، چنت تاکہ گد یا چنت گونی برنج چہ پاکستانءَ بیار انت و یا چہ اے دیما چنت بشکہ پٹرول ببر انت و پاسدارانی تیرانی آماچ ببنت و یا وتی فایدہءِ گیشتریں بھرءَ پاسداراں رشوتءِ صورتءَ بدینت ۔

دیمترا اے سنی و بلوچ دشمنیں آخوند ، وتی شیعھاں ھم احمق و نادان گشیت کہ پرچیا سنی و شیعہءِ وحدت بزاں تپاکیءِ گپءَ کننت۔

آ گشیت :

" بلے احمقیں شیعہ نلوٹیت کہ آگاہ ببیت ، احمقیں شیعہ نلوٹیت کہ وتی چماں پچ بکنت۔ اگاں مارا گوں تیرءَ بکشنت بھتر انت کہ مئے چک ھروئینی ببیت ۔ ما ھرچے کہ اے بابتءَ گپ و پریات بکنیں مارا گشنت کہ وحدت بزاں یکوئیءِ خلافا ھبر مکن ات۔ اشیءَ گوں وحدتءَ چکار انت ۔ وحدت ، وحدت ، شما وتی اے وحدتءَ منی سرا جت و مُشت نکن ات ۔ من چہ شمارا شرتر زاناں کہ وحدتءِ معنا چی انت ۔ وحدتءَ ھما مان نیارگءَانت کہ آ شیعھانی کمکءَ نیا انت و آھانی پریاتءَ نہ اشکن انت ۔ وحدتءَ ھما سرپد نہ بیگءَانت کہ نچار انت کہ چونیں بلاھے شیعہ طلابءِ سرا آیگءَانت ۔ وحدتءَ گوں ھما لئیب کنگءَانت کہ آ فکر کننت کہ گوں ابو لو لو بند کنگءَ درستیں مشکل حل بینت ۔ نہ ، اے پیم نہ انت ۔ اگاں شما ابو لو لو ءِ حرمءَ بند کن ات گڑا سنیانی دیما ھم بدار ات و آھاں سجل مدئیت ، اگاں مرد ات ۔ اگاں راست گش ات ، شیعہ ورنایاں ھم زانتکار بکن ات ۔ اگاں راست گش ات ، اگاں لوٹت کہ ھور ببئیت و شیعھاں تباہ و برباد بکن ات ، خدا حضرت زھراءِ خاطرا ، شمارا تباہ و برباد بکنت۔"

آ شرّیءَ زانت ، ایرانءِ اسلامی جمھوری و کم و گیش درستیں شیعہ ملا تیوکا سرظاھری شیعہ و سنیءِ تپاکیءِ گپءَ کننت بلے باطنءَ و دلءَ لوٹنت کہ سنی و خاص بلوچءِ پد گار ببیت ، بلے اے ملا لوٹیت کہ پدّر و ظاھرا ، نہ تیوکا ھبر بکننت بلکیں عمل ھم بکننت ۔ اے آخوندءَ لجّ  نکنت و میاریگ ھم نبیت کہ ماں ایرانءِ تھا شیعھاں مظلوم پیشداریت و سنیاں ظالم۔ اگاں ایرانءَ اے وھدی شیعہ مظلوم انت گڑا خدا رحم بکنت اے دگرانی سرا ۔ اے گپءَ وَہ ھر کس زانت کہ ایرانءِ اکثریت چہ اے حکومتءِ ظلم و دیکتاتوریءَ عذاب انت بلے سنی و اے دگہ قوم چو کہ بلوچ ، کرد ، ترکمن ، عرب ، ترک و اے دگہ گیشتر ظلم و زوراکیءِ آماچ انت ۔ آھانی دود و ربیدگ ، زبان و مذھب پادمال و توھین بیگءَانت ۔

گڈسرا باید گشگ ببیت کہ اے ایرانءِ اسلامی جمھوری انت کہ سنیانی مسیت و مدرسھاں شھید کنت و پروشیت ۔ درستیں سنی و بلوچ شرّیءَ زاننت کہ ماں بلوچستانءَ یک شیعہ مسیتے نہ تیوکا ھروجگ نبیتگ بلکیں شیعہ مسیت روچ پہ روچ گیشتر بیان انت ۔ بلوچستانءِ ھما جاھاں کہ پیسرا یک شیعہ اے ھم نبیتگ ھنی اوداں شیعہ مسیت بندگ و شیعہ میتگ آباد کنگ بیتگ انت ۔ بلے اے دگہ دیما سنیاں ماں تھرانءَ  مسیتءِ بندگءَ ھم نئیلنت ۔ بلوچ و سنی مولوی گرگ ، زندان  و شھید کنگ بیگءَانت ۔

اے عجبیں مظلومیتے پہ شیعہءَ !!!

 بلوچستان ٹی وی