چمشانک ٭
گوستگیں
چنت سالانی دراجیءَ ، ماں دنیاءَ بازیں بدلی یے آتکگ و انگت گوں تیزیءَ دیما آیان
انت ۔ اے بدلیانی اثر ماں جھانءِ ھر کنڈ و دمگےءَ پیداورانت ۔ حالرسانی میڈیا
و خاص انترنتءِ دیمرویءَ ماں اے پڑءَ مزنیں نقشے ھست انت ۔
گلوبلائیزیشن ، دموکراسی و چک چین کنوکیں سلاحانی اڑ ھما چیلنج انت کہ چہ ھر
وھدےءَ انوں گیشتر جھانءِ دلگوش وتی نیمگا گور کنائینتگ ۔ ماں انوگیں دورءَ مذھبی
واکانی و خاص اسلامی بنیادگرایانی ردوم ، ایران ءِ کوشش پہ نیوکلیر طاقتءِ حاصل
کنگءَ ، دیمروی کنوک و پدمنتگیں ملکاں گژن و نیزگاریءِ مسئلہ ، زند چاگرد ءِ پھریزگ
، تیل ءِ قیمتءِ گیش بیگ و گوں اشاں بندوکیں دگہ کسان و مزنیں ھنچیں مسئلہ انت کہ
مروچی دنیاءِ سیاست اش چپ و چاگرد کتگ ۔
ماں
جھانءَ دموکراسیءِ تالان بیگ ، چہ انسانی حق و راجانی وت مستریءِ حقءَ دیمپانی بیگءِ
پڑءَ مثبتیں گامگیج زیرگ بیتگ انت ۔ ماں نپال ءَ جمھوری و پارلمانی نظامءِ برجاہ
بیگ ، ماں پاکستانءَ فوجی جنرلانی خلافءَ مردمانی اوٹ دیگ ، کوسو ءِ استقلالءِ
جارءِ جنگ ماں اے پڑءَ اھمیں گامگیج انت کہ زیرگ بیتگ انت ۔
ماں
رودرآتکی بلوچستانءَ ، پاکستانءِ بلوچ دشمنیں فوجی ارشءِ خلافءَ ، بلوچ سرمچارانی
جد و جھد برجاہ انت ۔ بلوچ سرمچارانی جھد ، بلوچءِ راجی زرمبشءَ دیما بران و ماں
جھانءَ پجار کنان انت ۔ ھمے دابا بلوچ شیرزالانی جھد و بلوچستانءِ بازیں شھراں و
ھمے دابا ماں کراچیءَ آھانی مظاھرہ و پشت پناھی چہ بلوچ سرمچاراں شریءَ شون دنت کہ
بلوچستانءِ اے برحقیں راجی زرمبشءَ ، سرجمیں بلوچ راجءِ پشت پناھی گون انت ۔
ماں
عراق ، افغاستان و لبنان ءَ ، ایرانءِ دست مانگیجی ھور گوں آ دگہ جنجالاں سبب بیتگ
انت کہ اود ءِ سیاسی اڑ گیشتر ببنت و مذھبی بنیادگرایی ردوم بکنت ۔
ماں ھما
چنت راجی ملکان کہ دموکراتیکیں سیاسی نظامےءِ واھند انت چو کہ اسپین و بلجیم ءَ
اوداں راجانی اڑ و جنجال گوں یکدگرءَ کمتر بیتگ و ماں سیاسی واکءَ آھانی ھورکاری و
بھرءِ زیرگ شرتریں وڑےءَ گیشینگ بیتگ ۔ ماں ایرانءَ ما گندیں کہ ماں گوستگیں چنت
سالاں راجانی سرکٹ ، انسانی حقانی پادمال کنگ ، کشت و کوش و پاھو دیگ ، حکومتءِ
سیاستءِ بھرے بیتگ ۔ بلے اے دگہ دیما ، بلوچستان ، کردستان ، آذربائیجان و
ترکمنصحراءَ سیاسی گل و ھوربند پہ وتی حقانی گرگءَ ماں ایرانءِ راجانی فدرالیں
کانگرسءَ یکجاہ بیتگ و جھد کنگءَ انت ۔چیا کہ مروچی وت مستری و وت پجاری گوں اے دگہ
فکر و خیالاں چو کہ دموکراسی ، انصاف ، جنین و چکانی حق ، زند چاگرد ءِ پھریزگ و ۔
۔ ۔ ھمگرنچ انت ۔
تیلءِ
قیمتءِ اناگتیں گیش بیگ ءَ جھانءِ اقتصادءَ گوں بازیں مشکلاں دیم پہ دیم کتگ ۔
اشیءِ آسرءَ چہ درستاں گیشتر نیزگاریں ملک اثرمند بیتگ و بیگءَانت کہ مردم گوں
بیکاری و چیزانی قیمتانی گیش بیگءَ دیم پہ دیم انت ۔
ورگی
چیزانی کم ترگ ھم یکے چہ دگہ جنجالان انت کہ مروچی جھان گوں آئیا دیم پہ دیم انت و
بازیں آسیا و افریقايی ملک اشیءِ سببءَ نگیگیں جاورانی آماچ انت ۔
ایرانءِ
رژیم ، چہ جھانءِ گیشتریں مزنیں ملکانی نیمگا پہ جھانی سھلءَ مزنیں خطرے زانگ بیتگ
و ایرانءِ ھر روچیگیں کوشش پہ
نیوکلیر سلاحءِ جوڑ کنگ و واھند بیگ ءَ اے ترس گیشتر کتگ ۔
نزیک
سئے سال احمدی نژادءِ فاشیستیں حکومت و سی سال ایرانءِ جمھوری اسلامیءِ دیکتاتوریں
رژیمءَ بیگ انت و ھر روچے چہ اے روچاں بید چہ سرکٹ ، زندان و پاھو ، بیکاری و گرانی
، حکومتی کرپشن و دگہ ھزاران درد و رنجءَ ابید دگہ ھچ گندگ نہ بیتگ ۔
ماں
2005ءِ سالءَ گوں احمدی نژادءِ حکومتءِ آیگءَ ، انسانی حقانی پادمال کنگ ،راجانی
سرکٹ و پاھو دیگ چہ پیسرءَ انگت گیشتر بیتگ ۔ چشیں سالے نہ انت کہ ایرانءِ حکومت چہ
انسانی حقاں دیمپانی کنوکیں ھوربندانی نیمگا ایرجنگ و محکوم کنگ مبیت ۔ ھنچو زانگ
بیت کہ ایران ھما ایوکیں ملک انت ماں جھانءَ کہ اوداں کسانسالاں سر عام پاھو دنت و
جنیناں سنگسار کننت ۔
کارگر،
جنین و اسٹیوڈنٹانی سرکٹ و گر و بند انگت برجاہ انت ۔ بلوچستان ، کردستان ،
آذربائیجان ، ترکمن صحرا و الاھواز ءِ راجی-دموکراتیکیں جھد ءِ سرکٹ روچ پہ روچ گیش
بیان انت ۔
ایرانءِ
دیکتاتوریں رژیمءَ ھمے گوستگیں روچاں انترنتءِ حالرسانیءِ سرا ھم بیڑ برت و ھنچیں
قانونے پاس کت کہ حکومت ءِ خلافیں وبسایت و وبلاگ جوڑ کنوک و شنگ کنوکاں پاھو ھم
دات کت بکنت ۔
ایرانءِ
مردم ، اسلامی جمھوری ءِ رژیمءِ مافیایی سیاستانی آماچ انت و گوں بے حسابیں اڑ و
جنجالاں دیم پہ دیم انت ۔ نشہ آروکیں دارو ھر نیمگا تالان و نشہ کنوکانی حساب چہ دو
ملیون ءَ گیش گشگ بیتگ ۔ ایرانءِ حکومتی واکدار و بازیں کارندہ چہ یک نیمگے ماں اے
انسان دشمنیں کارءَ وت ھور انت و مزنیں زرے روپگءَانت و اے دگہ نیمگا روکپتی ملکاں
ریپینگءَ انت و نارکوٹکس ءِ خلافءَ جنگءِ نامءَ چہ آھاں ھم بازیں زرے گپتگ اش ۔
ایرانءِ حکومتءَ ماں بلوچستانءَ پراہ و جُھلیں چَرے جتگ و برز و زنڈیں دیوالے
بندگءَ انت تا کہ لوٹیت شون بدنت کہ مواد مخدرءِ خلافءَ جھدءَ انت بلے آییءِ بنیادی
مقصد بلوچانی چہ یکدگرءَ ھر چنت گیشتر جدا کنگءِ سازش و پندل انت ۔ چیا کہ گندگ
بیگءَ انت کہ اے انسان دشمنیں کار روچ پہ روچ ماں ایرانءَ گیش بیان انت ۔
ھمے
سالءِ مئیءِ ھشت تاریخءَ ، علی ابراھیمیان ( نھضت سواد آموزیءِ معاون) ءَ جار جت کہ
28 ملیون مردم ( ایرانءِ سرجمیں مردم 71 ملیون انت) وانگ و نبیسگ نزاننت ۔ ماں
بلوچستانءَ ناوانندھانی حساب چہ دگہ جاھاں گیشتر انت ۔ تعلیمءِ جاور روچ پہ روچ
بدتر بیان انت ۔ نیزگاری و بے روزگاریءِ سببءَ بازیں زھگے وانگءِ یل دیگءَ ناچار
بینت و پہ گرانیں کارانی نیمگا دیم کننت ۔
کارگرانی جاور باز نگیگ انت ، آھانی پگار و آمدن ھچ پیما زندگیءِ ضرورتاں پورہ کت
نکنت و بازینے چہ آھاں دائمی کارءِ واھند نہ انت ۔ اگاں کارجاہ بند ببینت آ بے
روزگار و زندگیءِ سکی و جنجالانی آماچ ۔
ایرانءِ
اقتصاد تیزیءَ اوشتءِ نیمگا روان و گوں نگیگیں جاوراں دیم پہ دیم انت ۔ جونءِ ماہءَ
جھانی بانکءَ جار جت کہ ایرانءِ رژیمءِ ردیں پالیسیانی سببءَ ایرانءِ اقتصادءِ ردوم
جھل روان انت ۔ بے روزگاری یکے چہ مستریں اقتصادی و اجتماعی (سماجی) جنجالان انت ۔
ایرانءِ حکومت مدام کوشش کنت تا کہ گوں دروگیں حسابانی شون دیگ و اعلام کنگءَ ملکءِ
اقتصادی ، سماجی و اے دگہ جاورانی نگیگی ءَ چیر بدنت۔آمریکاءِ" نیوجرسی" زانتجاہءِ
سیاسی اقتصادءِ استاد رضا قریشی ءِ گشگ انت کہ ایرانءِ حکومتءِ پیش کتگیں حساب راست
نہ انت و چشیں ردیں حساباں پہ وتی سیاسی مقصداں جار جنت ۔ بیکارانی حساب روچ پہ روچ
ودان انت و لھتے اقتصاد زانت و پٹ و پولکار بے روزگارانی حسابءَ تا سئے ملیون
اندازہ جننت کہ چہ اشاں ورنایانی حساب 25 تا 30 در سد انت ۔
بے
روزگاری و زندگی ءِ ضرورت ءِ چیزانی گرانی تا ھما حدءَ رستگ کہ اشیءِ سببءَ قتل ،
دزی ، وت کشی و رشوت ءِ گرگ و ورگ روچ پہ روچ گیش بیان انت ۔ بدکاری ھما حدءَ رستگ
کہ ورنائیں جنین ماں ھمساھگیں ملکاں ھم برگ و بھا کنگ بیگءَ انت ۔
کرپشن و
مالواری ءِ بیماریءَ حکومتءِ سر تا پادانی پنچءَ پتاتگ ۔ گوستگیں حکومتءِ صنایع و
معادنءِ وزیر اسحاق جھانگیری ءَ چہ ایرانءِ مرکزی بانکءِ جار جتگیں حسابانی مطابقءَ
، حساب کتگ و شون داتگ کہ گوستگیں دو سالانی دورانءَ چہ تیلءِ آمدنءَ 150 بلین ڈالر
ورگ و چیر و زیر کنگ بیتگ ۔
بانک ھم
مالی فساد و کرپشنءِ آماچ انت و حکومت پہ وتی تروریستی مقصداں چہ آھاں کار گریت و
منی لاونڈرینگ و غیر قانونی زیر و دئے کنت ۔
اقتصادی
کارزانتانی گشگ انت ، بے مھاریں انفلیشنءِ سببءَ ماں ایرانءَ نیزگار روچ پہ روچ وار
و بزگ تر و ھزگار سیرتر و مالدارتر بیان انت ۔ ایرانءِ ردیں سیاستانی سببءَ ،چہ"
تپاکیں راجانی ھوربند"ءِ نیمگا اقتصادی پابندی جنگ بیتگ انت و اے پابندی روچ پہ روچ
گیش بیان انت ۔
ایرانءِ
اسلامی جمھوریءِ رژیم ماں میان استمانی پڑءَ روچ پہ روچ ایوک بیان انت و جھانءِ
گیشتریں ھنداں ناپسندیں ملکے زانگ بیت انت ۔ بی بی سی ءِ یک رپورٹےءِ مطابقءَ کہ
ایرانءِ بابتءَ چہ 34 ملکءِ مردماں جست و پرس کنگ بیتگ ات ،شون دنت کہ ایران
ماں جھانءَ منفی تریں ملک پجاہ آرگ و زانگ بیت انت ۔
ایران
گوں وتی انقلاب صادر کنگءِ سیاستءِ رندگیریءَ مزنیں زرے ھمے راہءَ برباد کنگءَ انت
و ھمساھگیں ملکانی چو کہ عراق ، لبنان ، فلسطین ، بحرین ، عربستان سعودی و
افغانستانءِ تھا دست مانگیجی کنگءَ انت و آییءِ کوشش انت کہ ماں اے دمگءَ مزنیں واک
و طاقتے زانگ ببیت ۔
ایرانءِ
ھمے مزنیں طاقتور بیگ ءِ واب و شیعہ آئیڈیالوژیءِ تالان کنگءِ پالیسیانی رندگیری
انت کہ لوٹیت اتمی طاقتے ببیت و عملی صورتءَ جنگءِ آسءَ گون جنگءَ انت و گوں جھانءَ
دیم پہ دیم انت ۔
"تپاکیں
راجانی ھوربند"ءِ سکیوریٹی کونسلءَ تا انوں سئے رندءَ گوں اقتصادی پابندیانی جنگءَ
چہ جنگءِ آس ءِ بن گرگءَ دیمگیری کتگ تا کہ امنیں راھے درگیجگ ببیت ، بلے ایرانءِ
رژیم وتی نیوکلیر پروگرامءِ دیما برگءِ سرا زور پردیگءَ انت ۔ کہ اشیءِ آسر پہ
ایرانءِ مردماں ھچ شری یے نیاریت ۔ ایرانءِ حکومت زانت کہ جھان ھچ پیما تیار نہ انت
کہ ایرانءَ یک اتمی طاقتے قبول بکنت ۔ اے گپ امریکاءِ پریزیدنٹ ءَ باز برءَ سھرائیا
گشتگ کہ ھچ صورتءَ نئیلیت کہ ایران اتمی طاقتءَ حاصل بکنت ۔
ایرانءِ
اسلامی جمھوری ءِ رژیم یکے چہ رستر کرد ، انسان دشمن و ھونوارتریں حکومتان انت کہ
سی سال انت بید چہ واری و بزگی ، سرکٹ ، زندان و پاھو ، سنگسار و جنگ
دگہ چیزے
مردماں نداتگ و انوں یکبرے پدا تباھی آروکیں جنگےءِ آسءَ کٹینگءَ انت ۔
انسانی
تاریخ شاھد انت کہ زوراکی ، گر و بند و سرکٹءِ سیاست پہ انسانی زندءَ ھچ وڑیں گھتری
و وشحالی نیاریت ۔ مردمگری و شریں زند چشیں انسان دشمنیں رژیمانی بنگوج بیگءِ آسرءَ
کئیت ۔
ماں
بلوچستانءَ ،ایرانءِ بلوچ دشمنیں واکدارانی ظلم و زور و سرکٹ روچ پہ روچ گیش و
ودّان انت ۔ ماں ھمے گوستگیں یک سالےءِ تھا چشیں روچے نبیتگ کہ بلوچے گرگ و بندیگ
کنگ ، پاھو دیگ ، لٹ و کٹ و بے عزت کنگ مبیت ۔ بلوچ راجءِ سرا ظلم و زوراکی تا ھما
حدّءَ رستگ کہ کودک و کسانسالانی سرا ھم رحم کنگ نبیت ۔
دوازدہ سالیگیں بلوچ دُتگ " رویا سارانی " ءَ کئے شموشت کنت کہ ایرانءِ
ناھاریں سپاھیگانی گونڈلاں آییءِ نازاک و پاکیں بدن گیچن کت ۔ 3 دسمبر 2007ءَ دُزاپ
(زاھدان)ءِ میدان کوثر ءَ ، دو کسانسالیں زھگ ایرانءِ حکومتءِ تیرانی آماچ و شھید
کنگ بیت انت ۔ ھمے دابا "سعید قنبرزھی" ھم 17 سالگ ات کہ پاھو دیگ و شھید کنگ بیت ۔
گوں اے
درستیں ظلم و زوراکیاں ، بلے پدا ھم بلوچ جد و جھد کنوکاں پہ وتی حقانی گرگءَ نہ
تیوکا وتی جھد برجاہ داشتگ بلکیں تیزتر ھم کتگ و بلوچ راجءِ راجی زرمبش دیما روان
انت ۔
ماں
گوستگیں سالءَ ، " بلوچستانءِ راجی زرمبش " ءَ گوں اے دگہ بلوچ سیاسی جھدکار ، گل و
انسانی حقانی پانک جنیں ھوربنداںی ھمراھیءَ بازیں کوشش و جھدے کتگ تا کہ جھانءِ
انسانی حقانی پانک جنیں ھوربنداں ، ایرانءِ اسلامی جمھوریءِ رستریں کِرد و بلوچ
دشمنیں کارپداں شون بدینت و پیش بدارنت ۔ 2007ءِ سپتمبرءِ 17ءَ ،" امنسٹی انٹرنشنل"
ءَ روایرشتی بلوچستانءِ بابتءَ گوں تفصیلءَ رپورٹے شنگ کت کہ آییءِ تھا انسانی
حقانی پادمالی سھرائیا گندگ بینت ۔ ھمے رپورٹءِ تھا چہ ایرانءِ واکداراں لوٹگ بیتگ
کہ ماں بلوچستانءَ پاھو دیگ بند کنگ ببیت ۔
گپ
انسانی حقءِ ببیت یا دموکراتیکیں و راجی حق ، ایرانءِ حاکم کرّ بینت و گوش دارگءِ
بدلءَ وتی انسان دشمنیءَ انگت گیشتر کننت ۔ ھنچو کہ ما گندیں "انجمن صدای عدالت" ءِ
سروک "یعقوب مھرنھاد" ماں بندیگجاہءَ بے دردیءَ لٹ و کُٹ بیتگ و پاھوءِ حکم اش ھم
داتگ ۔ ھمے چنت ماہ پیش دو بلوچ عالم دین و وانینوک پاھو دیگ بیت انت ۔
ایرانءِ
اسلامی جمھوری ءِ رژیم ءَ ماں بلوچستان ءَ زندگی ءِ جاوراں پہ بلوچان روچ پہ روچ
بدتر کنان انت ۔ ماں بلوچستانءِ مستریں شھراں چوکہ "دُزاپ" ءَ
جار نہ جتگیں نظامی حکومت برجاہ انت ۔ پہ ترس و بیم ءِ دور دیگءَ ماں
"دزاپ"ءَ روڈانی سرا ھر نیمگا فوجی گاڑی
و موٹرسائیکل گوں گرانیں سلاحاں - چو کہ "آر پی جی " و " گرینف "- گرد انت ۔
حکومت ءِ اے سلاحبند بے لگام و مھارءَ ویل کتگ انت تا کہ بلوچانی خلافءَ دلءِ میلءَ
ترانپولی بکننت ۔
بلوچ
ورنا چہ حکومتءِ بلوچ دشمنیں کرداں سک بیزاریگ و اے چہ آھانی سگّ و اوپارءَ نوں در
انت ۔ ھر دابے کہ بیت کنت آ وتی نہ وشی و نفرتءَ حکومتءِ خلافءَ درشان کننت ۔ ھمے
18 جون 2008ءَ ماں سراوانءِ فوٹبالءِ لئیبجاہءَ، بلوچ ورنا گوں حکومتءِ سلاحبنداں
دیم پہ دیم بیت انت و چنت ورنا ٹپیگ و لھتے ھم گرگ و بند کنگ بیت انت ۔ رپورٹانی
مطابقءَ ھمے سالءِ اولی دوئیں ماھانی تھا 262 بلوچ گرگ و بندیگ کنگ بیتگ انت ۔"
سراوان"ءِ "اسپندک"ء دمگءَ شش بلوچ ورنا ایرانءِ حکومتءِ رستریں سلاحبندانی تیرانی
آماچ و کشگ بیت انت ۔ ھمے دوئیں ماھانی تھا ، ماں سراوانءِ دمگءَ 22 بلوچءَ گیش کشگ
بیتگ انت ۔
بلوچ
نیزگارانی لوگ و کڈل ھم چہ ایرانءِ بلوچ دشمنیں سیاستءَ نہ رکتگ انت ۔ 2008 اپریلءِ
26 تاریخءَ حکومتءِ بولڈوزر گوں سلاحبندانی ھمراھیءَ بے حال دیگءَ" دزاپ" ءِ بلوار
فاضلی ( کہ اوداں بلوچ جہ منند انت ) ءَ ارش کت و بزگیں بلوچانی لوگ گوں ھاکءَ ھم
لسون کت انت ۔ ھمے دورانءَ ماں سراوانءَ ، احمد آبادءِ میتگ ھم- کہ 50 سال انت
اوداں بلوچاں لوگ بستگ و نشتگ انت ، ھمے نیمونءَ کہ آھاں بے اجازتءَ لوگ بستگ انت –
مردمانی لوگ پروشتگ و ھراب کتگ انت ۔
اے
اولیگیں و دومی بر نہ انت کہ ایرانءِ حکومت چشیں ناروائیں کار کنت ۔ چہ اشیءَ پیش ،
دو رندءَ ماں چھبارءَ ھم نیزگاریں بلوچانی لوگ
بولڈوزر کنگ و پروشگ بیتگ انت ۔
ایرانءِ
اسلامی جمھوریءِ بنیاد شیعہ مذھبءِ سرا ایر انت و ماں بلوچستانءَپہ شیعہ مذھبءِ ھر
چنت گیشتر رواج دیگ و تالان کنگءَ ھر وڑا جھد و کوشش کنگءَانت ۔ در چہ بلوچستانءَ
شیعہ آرگ ، کار و زمین دیگ و نندینگ بیگءَانت ، بلوچستانءِ شرتریں و ڈلگتریں کار
شیعہ و غیر بلوچانی دستءَانت ۔ ماں بلوچستانءَ ، بلوچیں نمایندھاں ھچ پیمیں واک و
اختیارے نیست و آ چہ ترسءَ بنیادی مسئلھانی بابتءَ گپ ھم نہ کننت ۔ اے رژیمءِ
پالیسیانی سببءَ ، شیعہ و سنی ، بلوچ و غیر بلوچ ءِ درمیانء کش و چیل و نفرت ودی
بیتگ ۔
اگاں
بلوچستانءِ بے روزگاریءِ حدّءَ گوں ایرانءِ شیعہ-فارسءِ دمگاں دیم پہ دیم بکنیں گڑا
شرّیءَ سھرا بیت کہ ایرانءِ پالیسی تا کجام اندازہءَ بلوچ دشمن انت ۔ "اعتماد"ءِ
روچتاک چہ حکومت ءِ رسمی حسابانی مطابقءَ شنگ کتگ کہ ماں بلوچستانءَ بیکاریءِ حساب
35 درسد و" اصفھان"ءَ 4 درسد انت۔ ماں بلوچستانءَ ایرانءِ شیعہ حکومت ، وتی قانون
کار"ءِ پابندیءَ ھم نہ کنت و بلوچان
بے روزگار کنت ۔ چہ "دزاپ"ءِ "مہ بافت" کارجاہءَ بازینےءِ چہ کارءَ درکنگ و پھرہءِ
"بافت بلوچ" کارجاہءِ بند کنگ ھم چہ آییءِ ھمے سیاستان انت ۔ چہ بلوچستانءِ کار و
روزگارءِ حسابانی زانتکاراں واجہ
ریگی گشیت کہ گوستگیں سالءَ ماں بلوچستانءَ ، ماں حکومتی کار ءِ گرگءِ چکاس ءَ نزیک
5000 نفرءَ بھر زرت کہ چہ اشاں شست درسد بلوچ اتنت و 22 نفرءَ کار دیگ بیت بلے چہ
اشاں یک بلوچے ھم ھور نہ ات ۔
ایرانءِ
اسلامی جمھوریءِ بلوچ دشمنی ھر پڑے ءَ گندگ بینت ۔ 2008ءِ 7 مئی ءَ معاون آموزشی
نھضت سواد آموزی (تعلیمءِ دیما برگ و تالان کنگ) علی ابراھیمیان گوں "کیھان امروز"
روچتاکءَ گشت کہ ناوانندھانی حساب چہ اے دگہ درستیں جاھاں ماں بلوچستانءَ گیشتر انت
۔ رسمی حسابانی بنیادءَ ماں بلوچستانءَ ، 70000 کالج و زانتجاھی درس وانوک ھست ،
بلوچستانءِ زانتجاہ و کالجانی بن رھبندانی مطابقءَ باید 75 درسد درس وانوک چہ
بلوچستانءَ زیرگ ببنت ۔ بلے ما گندیں کہ اے حکومت وتی ھما رھبندانی کہ چہ آھاں
بلکیں بلوچ راجءَ فایدہ اے برسیت ، ھم عمل نکنت ۔ چہ اے 70000 درس وانوکاں ، بلوچ
چہ یک ھزارءَ ھم کمتر انت ۔ ماں ھمے پڑءَ یک دگہ پٹ و پولےءَ شون دیگ بیتگ کہ چہ ھر
ھزار بلوچ زھگےءَ کہ ماں اسکولاں وانگءَ بنگیج کننت ایوکا 20 نفر وتارا زانتجاہءَ
رسینت کننت و پدا چہ اشاں تیوکا 5 نفر تا آخرءَ رسنت و وتی وانگءَ سرجم کننت ۔
ماں
بلوچستانءَ بنگیجی وانگءِ معیار سک جھل انت ۔ بازیں جاھاں بلوچ زھگ ماں کاپرانی
چیرا وانگءَ انت ۔ "گِہ" ( نیکشھر) ءِ واننینگءِ سروک ءَ ماں 2008ءِ جولایی ءِ 13
تاریخ ءَ گوں "فارس " نیوز اجنسیءَ گشت کہ ماں" گِہ" ءِ شھرستانءَ 190 ھنچیں اسکول
انت کہ بان اش نیست و چُک کاپرانی چیرا نندگءَ مجبور انت ۔ حکومتءِ چشیں پالیسی بید
چہ بلوچ دشمنیءَ دگہ چیزے بیت نکنت چیا کہ تعلیمءِ پڑءَ چشیں مثال ماں سکیں
نیزگاریں ملکاں گندگ بیت ، نئیکہ ایرانءِ پیمیں سیریں ملکےءَ کہ آییءِ آمدن چہ
تیلءَ سالے گیش چہ 70 بلین ڈالر انت ۔
بلوچ
راجءِ دود و ربیدگ ھم لگتمال انت ۔
چکانی نامءِ گچین و بندگءِ حق ھم چہ بلوچ مات و پتاں گرگ بیتگ ۔ بلوچاں حق نیست ھما
ناماں کہ بلوچی پجارءِ شون دیوک انت وتی چکانی سرا پر بکننت ۔ ماتی زبانءَ ماں
اسکولاں وانگ یکے چہ بنیادی حقان انت کہ درستیں دموکراتیکیں ملک و راجاں منّ اتگ
بلے بلوچءِ زھگ وتی ملکءَ چہ اے حقءَ ھم زبھر انت ۔
ایرانءِ
حکومت ماں بلوچستانءِ دلگاہءَ گوں پراہ و جُھلیں چَر ءِ جنگ و بُرز و زنڈیں دیوالءِ
بندگءَ یک دگہ پندلے سازتگ تا کہ بلوچاں چہ یکدگرءَ ھرچنت گیشتر جدا و آھانی
رابطہءَ کمتر بکنت ۔ ایران بھانہ کنگ و پہ دنیاءَ ھنچو شون دیگ انت کہ اے کاراں پہ
ڈرگءِ قاچاقءِ دیمگیریءَ کنگءَانت و وتی اے پندلءَ تا حدے سوبین ھم بیتگ و چہ
یوروپی ملکاں بازیں زرے ھم گپتگ و وارتگ ۔
ایرانءِ
حکومتءِ بازیں واکدار و سلاحبند وت ھمے ڈرگ مافیاءِ بھرےانت و چہ ھمے راہءَ مزنیں
زرّے روپگ و مالے مچّ کنگءَانت ۔ اگاں آ ھور مبیتین اتنت گڑا ھزارانی ٹن ءِ حسابءَ
ھروئین و دگہ ھمے دابیں ڈرگ چہ ایرانءِ تھا نہ گوست ات و آ دستءَ سر
نبیت ات ۔
اے دگہ
دیما ما گندیں کہ چشیں نشہ دیوکیں دارو و نشہ کنوکانی حساب ، خاص ماں بلوچستانءَ
روچ پہ روچ گیش بیان انت ۔ اے ھم یکے چہ حکومتءِ بلوچ دشمنیں سیاستان انت تا کہ
بلوچ ورنا ھر چنت گیشتر وتی نشہ ءِ چن و لانچءَ ببینت و چہ اے دگہ راجی کاراں دور
ببنت ۔
ماں
بلوچستانءَ ، حکومتءِ راج دشمنیں پالیسیانی سببءَ زندءِ ھر تک و پھنات گوں اڑ و
جنجالاں دیم پہ دیم انت ۔ بلوچ ماں وتی سرڈگارءَ درآمد انت ، بلوچی زبانءِ
بیگواھیءِ چن و لآنچ بیگءَانت ، دود و ربیدگ و بلوچی پجارءِ ولگوج کنگءِ
پندل سازگ بیگءَانت ۔ بزاں اے حکومتءَ ماں بلوچستانءَ بید چہ بے روزگاری ، نشہ ،
رشوت، گر و بند ، سرکٹ ، پاھو و کشت و کوش دگہ چیزے بلوچ راجءَ نداتگ و سجھیں
بلوچستان پہ بلوچ راجءَ بندیگجاھےءَ بدل کتگ ۔
بلوچ
و خاص ورنا و سیاسی جھدکار، حکومتءِ اے
ناروائیاں مارگءَانت و ما گندگءَایں کہ بلوچ راجءِ برحقیں راجی زرمبش دیما روان انت
و گوں ایرانءِ اسلامی جمھوریءِ انسان دشمیں کارپداں ختم کنگ نبیت و تا ھما وھدی
برجاہ و بلکیں گوں تیزیءَ جنزان بیت تا کہ ظلم و زور ءِ "شیعہ کٹریں" رژیم چپیگ
ببیت و بلوچ وتی واجہ وت ببنت ۔
٭اے
نبشتانک چہ "بلوچستانءِ راجی زرمبش"ءِ بنجاھی کمیٹیءِ رپورٹءَ انت کہ ماں جولایی
2008ءِ کانفرنسءَ پیش کنگ بیت کہ نزآرگ و
چمشانکےءِ وڑا شنگ بیگءَانت ۔